طالبان د عمومي عفوې په نوم ځوانان غافل ګير کړي بيا يې ووژني
د طالبانو په واکمنۍ کې د ځوانانو او په ځانګړې توګه د پخواني حکومت کارمندان ورک کېدل او بيا يې مړي پيدا کېدل عادي شوې ده.
طالبانو د خپلې واکمنۍ د پيل په لومړيو کې عمومي عفوه اعلان کړه خو د عفوې سره سره هم فعالان او د پخواني حکومت کارمندان نيسي، ځوروي او شکنجه کوي يې.
تازه په خواله رسنیو کې د پخواني حکومت کارمند مجاهد بارک عکسونه لاس په لاس کيږي چې له ورک کېدو وروسته يې جسد موندل شوی.
ويل کيږي مجاهد بارک د عبدالولي شهباز زوی چې په خپل شخصي کاروبار بوخت وو د دېسمبر په ۱۵مه د کندهار ولايت په برو بازار سيمه کې لادرکه شو او په سبا يې د ښار د ۱۲مې حوزې اړوند سيمه مه کې د موټر سره مړی وموندل شو.
د خواله رسنیو فعالان د نوموړي د وژنې تور په طالبانو لګوي وايي طالبان د عمومي عفوې په نوم ځوانان غافل ګير کړي او بيا يې ووژني.
د يادونې وړ ده چې د طالبانو په يو نيم کلنه واکمنۍ کې د پخواني حکومت کارکوونکي او خبريالان تر بل هر وخت زيات ځورول کيږي او شکنجه کيږي.
د هېواد په يو شمېر ولايتونو کې بار بار د طالبانو له خوا د پخواني حکومت کارمندان او په ځانګړې توګه د پوځ ليکو کې پخواني پوځيان ونيول شول او د طالبانو تر سختو شکنجو لاندې شهيدان شوي.
نړيوالو هم د طالبانو له حکومت غوښتي چې د خپلې عمومي عفوې په وعدې ودريږي او د خلکو ځورونه ودروي خو طالبان پورتنۍ خبرې او ورته ادعاوې ردوي.