fbpx

طالبانو د الفتح عملیات اعلان کړل دفاع وزارت يې پروپاګند بولي

وسلوالو طالبانو نن سهار د یوې اعلامیې په خپرولو سره د الفتح په نوم د پسرلنیو عملیااتو د پیل خبر ورکړ او ويې  ویل چې دا عملیات له ځان څخه د دفاع او جګړې ګټلو لپاره اعلانوي

خو اوس تازه د د افغانستان د دفاع وزارت په یوه خبرپاڼه کې ویلي چې طالبانو په یو شمېر ولایتونو کې له سترو ماتي  وروسته د خپلو جنګیالیو د روحیې ساتلو لپاره دا ډول تبلیغات خپروي او څه نشي کولای.

له دې وړاندې افغان دولت هم د پسرلي په راتللو سره د وسلوالو مخالفانو پرضد د خالد په نوم عملیاتو د پیل خبر ورکړی وو.

د افغانستان دفاع وزارت د طالبانو د الفتح په نامه د عملیاتو اعلان یوه پروپاګند ګڼي او وايي، دغه ډله به هېڅ کله خپلو ناوړو اهدافو ته ونه رسېږي.

د طالبانو په اعلامیه کې هغوی له خپلو جنګیالیو څخه غوښتي چې د ملکي تلفاتو مخنیوی دي وکړي او د هغوی ژوند ته دي پاملرنه وکړي

د ۲۰۱۹ زیږدیز له پیل څخه تراوسه په بمي چاودنو جګړو او هوايي بمباریو کې زیات شمېر ملکي کسانو ته مرګ ژوبله اوښتې او د راپورونو له مخې د تیري فیبرورۍ میاشت کې د ملکیانو دا تلفات تر بل هروخت زیات وو.

د افغانستان په یو شمېر ولایتونو کې ملکیانو ته درنه مرګ ژوبله وا وښتله چې د بشري حقونو په ګډون نورو د څار ډلو د جګړې ټولې ښکېلې خواوې په دې تلفاتو کې ملامتې وبللې او ترې ويې غوښتل چې په جګړه ایزه حالت کې دي د ملیکانو ژوند ته لازمه پاملرنه وکړي.

د پسرلي په راتللو سره دولت او وسلوال مخالفان تل د دا ډول عملیاتو د پیل خبر ورکوي چې پرمهال يې د هېواد په ګوټ ګوټ کې درنې جګړې کیږي او پر ښکېلو غاړو سر بیره پکښي ملکیانو ته هم مرګ ژوبله اوړي.