ملګرو ملتونو ولې طالبانو سره د ګډ عکس اخيستو له امله بخښنه وغوښته!؟

ملګرو ملتونو د طالبانو د بيرغ لاندې د دغه سازمان د پلاوي له عکس اخيستو څخه بخښنه وغوښته.

د ملګرو ملتونو د سرمنشي وياند
سټيفن دوجاريک پرون جمعه فاکس خبري اژانس ته وويل چې دوی خبر شوي چې پلاوي يې د طالبانو سره د دغې ډلې د بيرغ لاندې عکس اخیستی او بايد چې داسې نه وو شوي.

نوموړي وويل ملګري ملتونه د دغې تېروتنې له امله بخښنه غواړي.

ياد عکس چې په کې د ملګرو ملتونو پلاوي په کابل کې د طالبانو سره د دوی د حکومت تر بيرغ لاندې اخيستی وو د پنجشنبې په شپه په خواله رسنيو کې لاس په لاس شوی وو.

د طالبانو حکومت د رسميت نه پېژندلو له امله د دغې ډلې بيرغ هم په‌ نړيوالو کنفرانسونو او ورزشي ميدانونو کې نه درول کيږي او د افغانستان په استازيتوب پخوانی ملي درې رنګه بيرغ درول کيږي. او نه هم د نورو هېوادونو پلاوي غواړي چې د طالبانو د بيرغ لاندې عکس واخلي.

طالبانو بيا په خپلو ټولو حکومتي ادارو کې د ملي بيرغ ځای خپل سپين بيرغ ته ورکړی او ان عامو خلکو ته هم د ملي بيرغ ګرځولو اجازه نه ورکوي.

د طالبانو د حکومت په رسمیت نه پېژندلو له امله دغه ډله وارخطا ده او زور یې له افغان ښځو وباسي چې د نړيوالو د غوښتنو پر خلاف پرې محدوديتونه او بنديزونه لګوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More