د افغانستان کرېکټ بورډ لوبغاړو لپاره جېم او د درملنې مرکز چمتو کړو
د افغانستان کرېکټ بورډ پرون يکشنبه خبر ورکړ چې د لوبغاړو لپاره جېم او د درملنې مرکز يې جوړ او ګټې اخيستنې ته وسپارولو.
کرېکټ بورډ پرون د يوې وېډيو په خپرولو وښوده چې د دغې ادارې په دننه کې د لوبغاړو لپاره د بدني روزنې او پياوړتيا مجهز جېم او د ورزشي ټپونو د درملنې مرکز جوړ کړ چې لوبغاړي به له دې وروسته په کې فزیکي تمرينونه کوي.
د کرېکټ بورډ د لوړو کارکردګيو مرکز مدير ويلي له دې وروسته به لوبغاړي او نه وي چې د ټپونو د درملنې او فزيکي پياوړتيا لپاره بهر لاړ شي.
عبدالولي امين وايي موږ د خپل جېم لپاره خارجي روزونکی هم نيولی چې د لوبغاړو د ورزشي ټپونو د رغولو ښه مهارت لري او همدا راز به يو بهرنی فزيوټراپېسټ هم د درملنې مرکز ته د ډاکټر په حيث راولو.
د يادونې وړ ده چې کرېکټ بورډ ياد دوه مرکزونه د دوه ميليونه افغانۍ په لګښت په ۲۵۵ متره مربع ساحه کې جوړ کړي دي.
افغان لوبغاړي د کرېکټ بورډ په داسې اقدام او هڅو خوشاله دي او وايي له دې وروسته به اړ نه وي چې د تمرين او درملنې لپاره بهر لاړ شي.
د کرېکټ افغان او نړيوال شننونکي هم وايي چې افغان لوبغاړي تر هر څه ډېر ښې بدني روزنې او تمرين ته اړتيا لري، که چېرې افغان لوبغاړي خپل فېټنېس جوړ کړي نو کولی شي د کرېکټ نړۍ لوی لوی لوبډلې ماتې کړي.
Comments are closed.