پېښور: د پوليسو په جومات کې ځانمرګي برید له امله درنه مرګ ژوبله اوښتې
د خیبر پښتونخوا مرکز پېښور ښار پوليس لاينز سيمه کې په يوه جومات کې د بمي چاودنې له امله سلګونه تنو ته مرګ ژوبله اوښتې.
دا يو ځانمرګی برید وو چې د پوليسو د لمانځه پر مهال رامنځته شو.
د خبريال وېب پاڼې د معلوماتو له مخې دا جومات د پوليسو په يوه کالوني کې دننه دی او ځانمرګی بريدګر هم د پوليسو په لباس کې جومات ته دننه شوي وو.
د پېښې له ځايه سرچينو خبريال وېب پاڼې ته ويلي چې تر دې دمه د بريد له امله ۲۹ تنه وژل شوي او او ۱۰۳ ټپيان دي.
روغتيايي مسوولين وايي لا هم ټپيان روغتونونو ته ور وړل کيږي چې د ځينو روغتيايي وضعيت ښه نه دی.
پاکستاني پوليسو ويلي چې د جومات يوه برخه هم نړیدلې او امکان دې ولري چې څو کسان تر خاورو لاندې هم شوي وي.
تر اوسه د دغې بريد مسووليت کومې وسله والې ډلې نه دی منلی خو په دې وروستيو کې په پاکستان کې د تحريک طالبان پاکستان يا ټي ټي پي له لوري چريکي بريدونه، هدفي وژنې او ځانمرګي بريدونه زيات شوي دي.