پېښور کې تر خونړي برید وروسته پاکستان افغانستان کې د ټي ټي پي خلاف د عملياتو خبر ورکړ
پېښور کې د پروني خونړي بريد وروسته د پاکستان حکومت افغانستان کې د ټي ټي پي يا تحريک طالبان پاکستان پر خلاف د عملياتو خبر ورکړی.
د پاکستان پوځ له خپلې دې پرېکړې د طالبانو حکومت ته هم خبر ورکړی دی.
خبريال وېب پاڼې ته طالب سرچینو ویلي چې پاکستان ورته پرون له بريد وروسته ويلي چې هغوی به د ټي ټي پي پر ضد عملیات کوي.
طالبان وايي په دې اړه به وروستۍ پرېکړه د دوی مشر ملا هیبت الله کوي.
په ورته مهال د پاکستان د دفاع وزیر طالبانو ته په اشارې ويلي چې خپله خاوره دې د پاکستان پر ضد کارېدلي ته نه پرېږدي.
نوموړی وايي طالبان د دوحې د تړون پر اساس مکلف دي چې افغانستان د نورو پر ضد کارېدلو ته پرې نه ږدي خو د ناټو او امريکا ځواکونو له وتلو وروسته ترهګرو پاکستان ته مخه کړې ده.
دا په داسې حال کې ده چې پرون د پاکستان په پېښور ښار کې پوليس لاينز سيمه کې په يو جومات کې پر پوليسو ځانمرګی برید وشو چې په کې درنه مرګ ژوبله واوښته.
د نړيوالو سره سره د طالبانو حکومت هم په جوماتونو کې بريد کول غندلي او دا يې حرام بللي دي په داسې حال کې چې دغې ډلې هم د جمهوريت پر مهال په جوماتونو، ښوونځيو او عامه ځايونو کې چريکي او ځانمرګي بريدونه کول.