fbpx

حمدالله محب:فساد کوونکي د افغانستان دښمنان دي

د افغانستان د ملي امنیت سلاکار وايي فساد او فساد کوونکي د افغانستان دښمنان او د دښمنانو په څېر چلند به ورسره وشي .

د امنیت شورا څخه په خپره شوې خبرپاڼه کې راغلي ، چې حمدالله محب دغه څرګندونې تېره ورځ لودیځ زون ته د امنیتي وضیعت د څېړولوپه موخه په خپل سفر کې کړې دي .

خبرپاڼه وړاندې لیکي چې محب همدارنګه په ۲۰۷ ظفر قول اردو کې جوړې شوې غونډې ته په وینا کې وویل چې د افغانستان دښمنان په افغانستان کې د پیاوړي نظام د موجودیت څخه ویره لري .

محب په دې سفر کې په لودیځ زون کې د امنیتي لوړو پوړو چارواکو د راپورونو له اودېدو وروسته وویل ، چې ویادي افغان امنیتي او دفاعي ځواکونه په پوره مېرړانې سره له خپل هېواد او ځمکنۍ بشپړتیا څخه دفاع کوي ، د ده په خبره امنیتي ځواکونه له هر ډول ګواښ په وړاندې ځواب ورکولی شي، نوموړي په لویدیځ زون کې د ټپی شویو امنیتي ځواکونو سره هم لیدلي دي .

نوموړي په خپله وینا کې په سوله هم ټيګار وکړ او ویې ویل چې افغانان باعزته سوله غواړي او په دې تړاو د دوی هڅې دوام لري .

حمدالله محب په دې سفر کې د لاجورد د لارې د کاروان پرانیسته هم وکړه او په هرات او لویدیځ زون کې به د مختلف اقشارو سره خپلو لیدنو ته دوام ورکړي  .

د هرات و والي ویاند رسنیو سره په خبرو کې ویلي ، چې نوموړي به نن هم په هرات کې وي او د دولتي او ملکي چارواکو سره به وګوري.