اميري: نړۍ بايد افغان ښځينه قاضيانې هېرې نه کړي
خبریال وېبپاڼه: د ښځینه قاضیانو د نړیوالې ورځې په مناسبت د افغان ښځو لپاره د امریکا ځانګړې استازې له نړۍ غوښتي، چې په افغانستان کې د ښځینه قاضیانو وضعیت ته پام وکړي.
رینا امیري دا خبره نن د ښځینه قاضیانو د نړیوالې ورځې په مناسبت په ټویټر کې کړې ده.
هغې ویلي: “نړۍ بايد افغان ښځينه قاضيانې هېرې نه کړي، چې له کار کولو منعه شوې او د خپلو کورنيو لپاره د ډوډۍ د برابرولو هڅه کوي.”
د هغې په وينا، افغان ښځينه قاضيانې د هغو کسانو له ګواښونو سره مخ دي، چې زندانونو ته يې لېږلې دي.
رینا امیري له نړۍ وغوښتل چې په افغانستان کې د دې ډلې ملاتړ ته لومړیتوب ورکړي.
د يادونې وړ ده، چې د طالبانو له واکمنۍ سره په هېواد کې د نورو پخوانيو دولتي کارکوونکو په څېر لسګونه ښځينه قاضيانې هم بېکاره شوې او اوس په ناوړه اقتصادي وضعيت کې ژوند تېروي.
د دې قاضیانو د سخت ژوند یو لامل دا دی چې طالبان ښځې د قاضي د مقام لپاره مناسبې نه ګڼي.
Comments are closed.