د پاکستان لومړی وزیر: عمران خان نه غواړي چې خلک له اقتصادي فشار څخه راووځي
خبریال وېبپاڼه: د پاکستان لومړي وزیر شهباز شریف پر عمران خان تور ولګاوه چې د پیسو د نړیوال صندوق د پروګرام په بیا احیا کې خنډونه جوړوي.
پاکستان ټوډی ورځپاڼې د شهباز شریف له قوله راپور ورکړ چې د تحریک انصاف مشر عمران خان نه غواړي چې د دغه هېواد خلک له افراطیت او اقتصادي فشار څخه ووځي.
د شریف په وینا، په سړکونو کې ګډوډي رامنځته کول د عمران خان د اجنډا یوه برخه ده، چې موخه یې په هېواد کې د بې ثباتۍ اور بلول دي.
شهباز شریف ویلي، عمران خان نه غواړي چې غریب خلک له افراطیت او اقتصادي فشار څخه راوباسي او زیاته یې کړه چې له محکمو څخه د پخواني لومړي وزیر تېښته د «بزدلي» ښکاره نښه ده.
باید وویل شي، چې پاکستان دا مهال له یو لړ اقتصادي ستونزو سره لاس او ګریوان دی او د دې هیواد د بهرنیو اسعارو زیرمې کمې شوي چې د اسلام آباد وړتیا په اړه پوښتنې راپورته کوي چې د خپلو بهرنیو پورونو مسؤلیتونه پوره کړي.
د ویلو ده، چې اوس وخت کې په پاکستان کې ډیر خطرناک حالات دي او د هیواد په اقتصادي لید کې د بنسټیزو بدلونونو نښې نه لیدل کیږي.
د یادونې ده، چې ستونزه یوازې بهرني پورونه نه دي، بلکې د کورنیو پورونو مسله هم ده، چې دغه هېواد یې له سختو ستونزو سره مخ کړی دی.
هېره دې نه وي، چې ځینې بهرني عوامل لکه مظاهرې، د تیلو او توکو د بیو لوړوالی هم د پاکستان د ستونزو په لا زیاتیدو مستقیم اغیز لري.