تخار کې ۱۶ کان کیندونکي مړه شوي
خبریال وېبپاڼه: په تخار کې ځایي سرچینې وایي، چې په دغه ولایت کې، د یوې ترافیکي پېښې له امله ۱۶ کان کیندونکی وژل شوي او ۷ نور ټپیان دي.
دا پېښه نن د تخار ولايت د چاه آب ولسوالۍ په (انجير کلي) کې هغه مهال رامنځته شوه، چې کانکېندونکي په يوه پیکپ موټر کې د سرو زرو د “پستې کان” ته روان وه.
سرچينې خبریال وېبپاڼې ته ویلي، چې په دغه موټر کې ۲۲ تنه کان کیندونکي سپاره وه.
د موټر چلوونکي تېز سرعت او بېپروایي، د دغې خونړۍ پېښې لامل شوې ده.
د پېښې نور ټپیان د تخار مرکزي روغتون ته لېږدول شوي، خو ټپيانو روغتيايي حالت د اندېښنې وړ بلل شوى دى.
په تخار کې طالبانو تر اوسه په دې اړه څه نه دي ویلي.
د تخار ولایت چاهاب ولسوالۍ کې د سرو زرو یو ستر کان شته، چې په دغه کان کې هره ورځ سلګونه کسان کار کوي.