د زندانیانو له خلاصون وروسته دې د سولې مخامخ خبرې ژر پیل شي

خبریال وېب پاڼه/ د ۱۵۰۰ زندانیانو تر خلاصون وروسته دې د سولې مخامخ خبرې له ځنډ پرته پیل شي.

د افغانستان د ملي امنیت شورا وايي، د طالب بندیانو له خلاصون سره باید د سولې مخامخ خبرې پیل شي.

د افغانستان امنیت شورا له طالبانو غوښتي چې د دوی د بندیانو په خلاصون سره دې د سولې مخامخ خبرې پیل کړي.

د دغې شورا په اعلامیه کې راغلي افغان دولت له طالبانو غواړي، چې تاوتریخوالی کم کړي، څو د ۱۵۰۰ زندانیانو تر خلاصون وروسته د سولې مخامخ خبرې له ځنډ پرته پیل شي.

د دولت د سولې د هڅو په ترڅ کې پرون هم د ولسمشر غني له فرمان سره سم د څرخې پله له زندانه ۱۰۲ تنه نور طالب زندانیان خوشې شول، چې ورسره د ټولو خوشې شویو زندانیانو تعداد ۸۵۰ تنو ته ورسېد.

افغان دولت پر طالبانو غږ کړی، چې د حکومت له خوا د ورسپارل شوي لېست سره سم، د امنیتي ځواکونو غړي او ولسي خلک چې طالبانو تښتولي، له ځنډ پرته دې خوشې کړي.

د طالبانو سیاسي دفتر ویاند سهېل شاهین هم پرون ماښام په یوه پیغام کې د خپلو زندانیانو د خوشې کېدو هرکلی وکړ او له حکومته یې وغوښتل چې دا بهیر ګړندی کړي.

له دې سره بیا نن د امریکا دفاع وزیر وویل، چې د افغانستان د سولې بهیر هغه ډول چې تمه وه ترسره نه شو ځکه طالبانو ونه شو کولای چې تاوتریخوالی کم کړي.

مارک اسپر وايي چې د افغانستان امنیتي ځواکونو باندې د طالبانو بریدونو زیاتوالی موندلی او امریکا هم د افغان امنیتي او دفاعي ځواکونو څخه ملاتړ ته دوام ورکوي آو ټینګار یې کړی دی چې اجازه به ورنه کړي چې افغانستان یو ځل بیا د ترهګرو په امن ځالې باندې بدل شي.

اسپر د افغان دولت او طالبانو له لوري د زندانیانو خوشې کېدو څخه هر کلی کوي خو بیا وايي چې دا بهیر باید د بین الافغاني خبرو د پيلېدو له پاره ګړندی کړل شي.

د امریکا دفاع وزیر وايي، په افغانستان کې له ټولو لوریو سره کار کوي، څو له طالبانو سره د امریکا لاسلیک شوی تړون په بشپړه توګه عملي شي.