fbpx

په بروکسل کې نن د افغان سولې په اړه کنفرانس جوړیږي

خبریال وېب پاڼه – کابل ۲۲مۍ ۲۰۱۹ / د افغان سولې په اړه نن چهارشنبه د بلجیم پلازمېنې بروکسل کې دوه ورخنی کنفرانس جوړیږي .

د سولې عالي شورا څخه په یوې خپرې شوې خبرپاڼې کې راغلي ، چې دغه کنفرانس په اروپا کې د سولې د انسټیټیوټ له لوري جوړیږي ، د سولې د عالي شورا رئیس خلیلي  په دې کنفرانس کې د ګډون په موخه بروکسل ته رسېدلی دی او په پام کې چې نن په دغه کنفرانس وینا وکړي ، په دې کنفرانس کې د اروپايي ټولنې یو شمېر استازو او همدارنګه د ناټو خینو غړو او لوړپوړو چارواکو ګډون کړی دی .

ویل کیږي چې په دې کنفرانس کې به په افغانستان کې د سولې د مذاکرات په روان وضعیت بحث وشي .

د دې کنفرانس په اړه د کابل یو تن اوسېدونکي او د شرعیاتو پوهنځي محصل ابوزر خبریال سره په خبرو کې وویل چې دغه کنفرانس د سولې لپاره یو ښه ګام دی ، د نوموړي په خبره د سولې لپاره چې کوم ګام اخیستل کیږي دوی یې هر کلی کوي او راتلونکې سولې لپاره خوشبیني زیاتوي .

دا په داسې حال کې ده چې تردې کنفرانس یوه ورځ وړاندې  د اروپايي ټولنې ځانګړي استازي رولانډ کوبیا په قطر کې د طالبانو د سیاسي دفتر له مشر ملا عبدالغني سره کتلي دي او سولې د روان بهیر په اړه یې ورسره خبرې کړې دي .

د طالبانو د قطر دفتر ویاند سهیل شاهین د رسنیو سره په خبرو کې ویلي ، چې ملابرادر د کوبیا سره په افغانستان کې پر روانو حالاتو ، سولې مذاکرات په افغانستان کې د ملکي تلفاتو د مخنیوي او همدارنګه د بشري مرستیو په رسولو خبرې کړې دي .

همدارنګه کوبیا په دې لیدنه کې د افغانستان په اړه د اروپايي ټولنې د پالیسۍ وضاحت هم وکړ او د اروپايي ټولنې په استازیتوب یې د افغان سولې لپاره هر ډول مرستې ډاډ ورکړ. نوموړي همدارنګه ټينګار وکړ چې په راتلونکې کې به هم د طالبانو له مشرانو سره په قطر کې خپلو لیدنو ته دوام ورکړي .