اردو د طالبانو لخوا ویجاړ شوی سړک بېرته جوړ کړ

خبریال وېب پاڼه/د هلمند په نادعلي ولسوالۍ کې د طالب اورپکو لخوا ۳ کیلو متره سړک په بمونو الوځول شوی ؤ چې اردو بېرته جوړ کړ.

د ۲۱۵ میوند قول اردو د انجنیرۍ ټیم په هلمند کې هغه ۳ کیلو متره سړک بېرته جوړ او د خلکو پر مخ خلاص کړ چې طالب اورپکو کې په بمونو الوځولی ؤ.

دا لومړی ځل نه دی چې وسلوال طالبان سړک د بمونو په واسطه اړوي. تر دې د مخه یې د هېواد په ګوټ ګوټ کې سړکونه او عامه تاسیسات په بمونو الوځولي او وران کړي دي.

تېر کال طالب اورپکو د وردګو ولایت په بندچک ولسوالۍ کې هم څه کم دری کیلو متره سړک په بمونو پوښلی ؤ او شاوخوا ۴ میاشتې د عامو خلکو خلکو پر مخ عمومي سړک بند ؤ. ولسي خلک اړ وو چې په یوه لرې او ویجاړه شوې لار د موټرو تګ راتګ وکړي.

طالب اورپکو په تېرو څه کم دوو لسیزو کې د هېواد په هره سیمه کې پلونه، سړکونه او نور عام المنفعه ځایونه په بمونو الوځولي دي، چې له امله یې زرګونو او لکونو خلکو ته زیان اړولی دی.

د هلمند ولایتي چارواکي په نادعلي ولسوالۍ کې د طالبانو لخوا د ویجاړ شوي او په بمونو د الوځول شوي سړک په هکله بشپړ جزیات نه دي خپاره کړي خو زیاتوي چې د ۲۱۵ میوند قول اردو لخوا یې د بېرته جوړېدو چارې بشپړې شوې دي او د خلکو پر مخ د ګټې اخیستنې لپاره چمتو شوی دی.

هلمند د هېواد په جنوب لویدیځ زون کې یو نا امنه ولایت دی چې له طالب اورپکو سربېره په کې د نشه یي توکو مافیا هم فعالیت لري. په دغه ولایت کې د کال ۱۲ میاشتې جګړه روانه وي او ګڼو افغان امنیتي ځواکونو، ولسي وګړو او ترهګرو ته په کې مرګ ژوبله هم اوړي.

دغه سړک د نادعلي ولسوالۍ د لوی مانده اړوند په کوپک سیمه کې په بمونو وران شوی ؤ.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More