۸۵ سلنه ترهګریز بریدونه حقاني شبکې پورې تړاو لري

خبریال وېب پاڼه/ که څه هم موده وړاندې د حقاني شبکې یو مهم غړی د افغان حکومت له خوا له بند ازاد شو خو اوس تازه د پکتیا ولایتي مسؤولین وایي لا هم دا ډله خپلې جګړې ته دوام ورکوي.

د پکتیا والي شمیم خان کټوازي ویلي، چې په دې ولایت کې لا هم تر ۸۵ سلنه زیات ترهګریز بریدونه د حقاني شبکې له لوري د پاکستاني وسله والو په مرسته تر سره کیږي.

له هغه وروسته چې د حقاني شبکې یو مهم غړی انس حقاني د افغان حکومت له بند خوشې شو ډېری افغانان په دې نظر و چې د یادې ډلې له خوا به په افغانستان کې جګړه کمه شي.

اوس تازه د پکتیا ولایتي مسؤولین وایي په دې ولایت کې لا هم ډېر ترهګریز بریدونه د حقاني شبکې له خوا تر سره کیږي دوی ولایتي چارواکي وایي د یادې ډلې د بریدونو د شنډولو لپاره یې پوره کار کړی.

د مسؤولینو په خبره په پکتیا کې یې د حقاني شبکې له خوا د جنګیالیو د جلب او جذب کچه را کمه کړې خو وایي اوس د یادې شبکې ډېری وسله وال پاکستانیان دي او د ډیورنډ فرضي کرښې نه د جګړې لپاره د پکتیا بېلابېلو سیمو ته را اوړي.

په ورته وخت کې بیا د پکتیا ولایتي شورا غړي وایي چې د انس حقاني خوشې کېدو د یادې ډلې په جګړه کې نرمښت را نه ووست.

د دوی په خبره د سولې په پروسه کې له بند زیات خوشي شوي طالبان بېرته د جګړې لیکو ته ستانه شوي چې څو تنه یې په دې ولایت کې له امنیتي ځواکونو سره په مخامخ جکړه کې ووژل شول.

درې ورځې وړاندې د پکتیا په مرکز ګردېز کې د ملي پوځ د تأسیساتو له ودانۍ سره څنګ کې موټر بم چاودنه وشوه چې د مسؤولینو په خبره یاد برید هم د حقاني شبکې او لشکر طیبه وسله والې ډلې له خوا تر سره شوی و.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More