خلیلزاد دې د طالبانو د سپینولو پر ځای سولې ته کار وکړي

خبریال وېب پاڼه/یو شمېر نړیوالې رسنۍ د افغان سولې لپاره د امریکا ځانګړی استازی له طالب اورپکو په ملاتړ او د خپلې هوکړې پر ستاینه تورنوي.

د واشنګټن ایکزماینز په نوم یوې غربي رسنۍ په یوه مقاله کې د افغان سولې لپاره د امریکا د بهرنیو چارو وزارت پر ځانګړي استازي زلمي خلیلزاد باندې توندې نیوکې کړې دي او نوموړی یې د طالب اورپکو په ملاتړ او د افغان حکومت پر وړاندې د منزوي کولو په دریځ تورن کړی دی.

ایکزمایز نشریې په خپله وروستۍ ګڼه کې لیکلي دي چې زلمی خلیلزاد په دې وروستیو کې د طالب اورپکې ډلې لپاره په نړیواله لابۍ لګیا دی او هڅه کوي افغان حکومت چې د دغې وسله والې ډلې پر وړاندې د جنګېدو مسؤلیت په غاړه لري، منزوي کړي او ترهګر طالبان سپین وښیي.

دوی پر زلمي خلیلزاد غږ کوي چې د دې ډول مشروطو او بې ځایه هڅو پر ځای دې د سولې لپاره کار وکړي او افغانستان دې له اوږد جګړه ییز بحران څخه وباسي.

دا په داسې حال کې ده چې په دې وروستیو کې پاکستان ته د خلیلزاد سفرونه زیات شوي دي او د دغه هېواد د پوځ له مشر سره یې څو لیدنې کړې دي چې د ځینو لیدنو جزیات یې هم رسنیز شوي نه دي. تر دې وړاندې هم خلیلزاد پاکستان ته زیات سفرونه کول او د شنونکو په باور نوموړی له پاکستاني لوري سره د طالبي پرژې پر ادلون او بدلون خبرې کوي تر څو د افغان کشالې لپاره یې یو نوي ماموریت ته را وبولي.

تېره اونۍ زلمي خلیلزاد هند ته د خپل سفر په ترڅ کې د دغه هېواد له چارواکو څخه وغوښتل چې له طالبانو سره مستقیمه اړیکه ټینګه کړي او خپلې اندېښنې ورسره شریکې کړي. تر دې وړاندې هند په ځلونو ویلي وو چې دوی د افغان سولې له خبرو څخه د افغان حکومت په مشرۍ هرکلی کوي او له طالبانو سره چې د پاکستان له ملاتړ برخمن دي، د خبرو کولو لېوالتیا نه لري.

ایکزماینز وړاندې په خپله مقاله کې لیکي چې خلیلزاد هڅه کوي د خپلې کړې هوکړې په ستاینه وخت تېر کړي او په دې سره د طالب اورپکو لخوا ټولو ترهګریزو فعالیتونو او خونړیو بریدونو ته برأت ورکړي. سرچینه زیاتوي چې طالب اورپکي د تړون مخینه نه لري نو له همدې کبله ښایي هېڅ تړون ته ژمن پاتې نه شي.

یادې شوې نشریې له هند څخه د افغان سولې لپاره د هند را بلل هم نا معقول دریځ بللی دی.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More