یونسکو د افغان ښځینه خبریالانو خوندیتوب ته اندېښمنه ده

خبریال وېب پاڼه/ د ملګرو ملتونو علمي او فرهنګي سازمان یا یونسکو په افغانستان کې د ښځینه خبریالانو پر وړاندې د نا امنیو له امله سخت اندېښمن دی.

د ملګرو ملتونو دا علمي او فرهګني سازمان وایي، افغانستان کې د ښځینه خبریالانو پر وړاندې اساسي ستونزه نا امني ده.

یونسکو ټینګار کوي، چې د افغانستان له رسنیو، خبریالانو او په ځانګړې توګه د ښځینه خبریالانو ملاتړ او حمایت د دوی له لومړیتوبونو څخه دي.

یاد سازمان زیاتوي، چې د تېرو ١٩ کلونو په ترڅ کې په افغانستان کې د رسنیو او مطبوعاتو وده او پرمختګ له لویو لاسته راوړنو څخه ده.

په افغانستان کې د رسنیو او مطبوعاتو په ډګر کې کار کول خورا له ننګونو سره مخ دی.

لا هم افغانستان د خبریالانو د ژوند لپاره خطرناک هېواد دی، په را وروسته کلونو کې په لسګونه خبریالان د خبري پوښښونو پر مهال د بریدونو او چاودنو ښکار شوي، یو شمېر د هدفي وژنو په ترڅ کې شهیدان شوي او د ځینو ژوند لا هم په خطر کې دی.

په ورته وخت کې جګړې، نا امنۍ، ګواښونو او خطرونو سره سره اوس د کرونا ویروس هم د خبریالانو ژوند ګواښي.

د افغانستان د رسنیو په لسګونه کارکوونکي پر دې ویروس اخته دي، یو عمده لامل یې د ډاکټرانو او ناروغانو سره د خبریالانو مستقیم تماس دی چې ډېر کله د خبري پوښښونو لپاره ورځي.

تېره ورځ د آریانا او آریانا نیوز کارکوونکی سلیمان یوسفي چې پر کرونا ویروس اخته شوی و، د نفس تنګۍ له امله یې د افغان جاپان په روغتون کې ساه ورکړه.

نوموړي له لسو کالونو را په دې خوا د آریانا او آریانا نیوز ټلوېزیون سره د موټر چلوونکي په توګه دنده ترسره کوله.

د خپلواکو رسنیو د ملاتړ اداره یا نی وایي اوس مهال هم د لسګونو رسنیو کار کوونکي او حتی د یوې رسنۍ له پنځوسو ډېر کار کوونکي پر کرونا ویروس اخته دي.

یاد بنسټ وایي، د رسنیو مدیران او کارکوونکي دې له دې ناروغۍ نه د خوندیتوب په موخه په کاري ځایونو او د کار پر مهال روغتیایي لارښوونې عملي کړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More