د جګړې له ښکېلو خواوو د کونډو او یتیمانو غوښتنې

خبریال وېب پاڼه/په کندهار کې لسګونه هغو ماشومانو او کړنډو چې خپل پلرونه او خاوندان یې د روانې جګړې له امله له لاسه ورکړي وو، لاریون وکړ.

د کندهار لسګونه هغو کونډو ښځو او ماشومانو چې خپل عزیزان یې د روانې جګړې له امله له لاسه ورکړي دي، لاریون وکړ او د جګړې له ښکېلو خواوو یې د سولې او دایمي اوربند غوښتنه وکړه.

دغه کونډې او یتیمان وروته له هغه په لاریون لاس پورې کوي چې وړمه ورځ هم په کندهار کې د سړک پر غاړه ماین د ګڼ شمېر ملکي وګړو ژوند واخیس او یو شمېر نور یې سخت ټپیان کړل.

له امریکا سره د وسله والو طالبانو د سولې له لومړني تړون را وروسته شاوخوا دری میاشتې تېرېږي خو لا هم دغې وسله والې ډلې د افغان ځواکونو او ملکي وګړو پر وړاندې خپلو بریدونو ته دوام ورکړی دی. که څه هم له اختر وروسته د جګړې په لومړۍ کرښه کې د پامکم وکړ کموالی راغلی خو په ولسي کچه لا هم مرګ ژوبله درېدلې نه ده.

یوازې په تېرو دوو اونیو کې تر شلو زیاتو ملکیانو د سړک غاړې ماینونو له امله چې وله والو طالبانو کرلي دي، خپل وند له لاسه ورکړی دی.

په کندهار کې د لاریون والو ښځو لخوا بېلا بېل شعارونه زمزمه کېدل چې یو یې همدا د جګړې له ښکېلو لوریو څخه د تاوتریخوالي له منځه وړل او سوله کول وو. دوی وایي روانې جګړې د ټول هېواد وګړي د غم په ټغر کېنولي دي او دغه جګړه په ښکاره ورور وژنه ده.

دوی د جګړې له دواړو خواوو وغوښتل چې په خپل ولس رحم وکړي، جګړه ودروي او د سولې خبرو ته تمرکز زیات کړي.

د کندهاري کونډو میندو او ماشومانو لخوا د جګړې دواړو لوریو ته ګواښ وشو چې که د دوی غوښتنې و نه منل شي، دوی به خبلو لاریونونو ته دوام ورکړي.

په افغانستان کې هر کال د جګړې له امله زرګونه ملکیان خپل ژوند له لاسه ورکوي او زرګونه نور سخت ټپیان کوي چې له دوی څخه ډېری یې د وجود ځینې برخې له لاسه ورکوي او په معیوب توب سره یې ټول ژوند تریخ کېږي.

که څه هم په دې وروستیو کې یو ځل بیا د سولې لپاره هیلې را غوړېدلې دي خو لا هم د بین الافغاني مذاکراتو د پیل نېټه او ځای په ډاګه شوي نه دي.

تېره ورځ د مصالحې عالي شورا ډاکتر عبدالله وویل چې ډېر ژر به د بین الافغاني مذاکراتو ځای او نېټه هم اعلان شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More