پاکستان وايي د افغان سولې له بهیر خنډونه لېرې شوې دي

خبریال وېب پاڼه/ بین الافغاني خبرو ترسراوي لپاره د قطر وروستي کیدل!

صادق خان وايي د افغانستان سولې بهیر له هیلو څخه زیات پرمختګ کړی دی او د دې خبرو په وړاندې خنډونه لېرې کړل شوي.

په ورته وخت، پاکستاني رسنیو لیکلي، چې د بین افغاني خبرو ترسراوي له پاره د قطر هېواد وروستی شوی او ټولو لوریو په دې اړه هوکړه کړې ده.

پاکستاني رسنیو د پاکستان لومړي وزیر ځانګړي استازي صادق خان په حواله باندې لیکلي، چې د افغانستان سولې بهیر له هیلو څخه زیات پرمختګ کړی دی او د دې خبرو په وړاندې ځينې خنډونه لرې کړل شوي دي او د بین الافغاني خبرو ترسراوي له پاره چمتوالی نیول شوی دی.

پاکستاني رسنیو دا هم لیکلي، چې طالبانو د بین الافغاني خبرو نه وړاندې د هند هېواد سره خبرې کول هم رد کړي دي.

وړاندې زلمي خلیلزاد هند ته د سفر په ترڅ کې د دې هېواد له مشرانو څخه غوښتنه وکړه چې که د افغان سولې په اړه اندېښنې لري د طالبانو سره دې مستقیمې خبرې وکړي.

له دې سره بیا هم مهاله د افغانستان سولې له پاره د امریکا بهرنیو چارو وزارت ځانکړي استازي زلمي خلیلزاد د پاکستان د پوځ د مشر سره لیدنه کړې ده.

په پاکستان کې د امریکا سفارت خبرپاڼې کې راغلي، خلیلزاد د دوحې د سفر نه وروسته تېره ورځ پاکستان ته ولاړ او د دې هېواد چارواکو سره یې د سولې نورو ګامونو، د طالبانو او حکومت له لوري د زندانیانو خوشې کېدو او بین اافغاني خبرو په اړه بحث کړی دی.

خبرپاڼه کې وړاندې راغلي، خلیلزاد د افغانستان سولې په برخه کې د پاکستان له هڅو هرکلی وکړ.

قطر کې د طالبانو سیاسي دفتر ویاند سهیل شاهین هم په خپله ټویټر پاڼه باندې لیکلي دي، د طالبانو سیاسي دفتر مشر له زلمي خلیلزاد سره لیدنه کې د زندانیانو خوشې کېدو او بین الافغانی مذاکراتو پيلیدو پر موضوعاتو بحث کړی دی.

شونې ده چې خلیلزاد د پاکستان څخه وروسته کابل ته راشي او د طالبانو او پاکستاني چارواکو سره یې د لیدنو جزییات افغان حکومت مشرانو سره شریک کړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More