پاکستاني پوځیان کونړ ته را ننتولي، حکومت چوپ دی

خبریال وېب پاڼه/د کونړ ایت اوسېدونکي شکایت کوي چې پاکستانۍ ملېشې دد کرېښې دې غاړې ته را اوښتي دي او نظامي تاسیسات یې جوړ کړي خو مرکزي حکومت چوپ پاتې دی.

د کونړ ولایت اوسېدونکي د دغه ولایت یو شمېر ولسوالیو کې د پاکستاني ملېشو د را اوښتو خبر ورکوي او زیاتوي چې په ځینو کلیو کې یې پوستې اچولې دي خو حکومت تر دې دمه هم چوپ پاتې دی او هېڅ راز ځواب یې ورته ویلی نه دی.

دا په داسې حال کې ده چې څو ورځې وړاندې هم په ولسي جرګه کې د کونړ ولایت استازو د پاکستاني پوځیانو د را اوښتو شکایت کړی ؤ او له حکومت څخه یې غوښتي وو چې په ډیپلوماتیکو اړیکو دې دا ستونزه هواره کړي خو تر دې ده حکومت نه ډیپلوماسي کارولې او نه یې د زور ښودلو هڅه کړې ده.س

پاکستاني پوځیان وخت ناوخت د ډیورنډ تپل شوې کرښې په اوږدو کې ورته سرغړونې کړې دي او له صفري نقطې را اوښتي دي چې ډېری وخت د افغان پوله ساتو ځواکونو له غاښ ماتوونکي ځواب سره هم مخ شوي دي. د تېرې شنبې په ورځ د کونړ اوسېدونکي وویل چې د دغه ولایت د سرکاڼو ولسوالۍ اړوند ناوا پاس سیمه کې د ډیورنډ فرضي کرښې په اوږدو کې پاکستاني ځواکونه له صفري نقطې را اوښتي او نظامي بېسونو جوړولو باندې لګیا دي خو هغه مهال هم مرکزي حکومت غبرګون و نه ښود.

څه د پاسه یوه میاشت وړاندې هم د پاکستاني ځواکونو لخوا ورته سرغړونه شوې وه او د کندهار په سپین بولدک کې یې له صفري نقطې سره د اغزن سیم د کشکولو هڅه کوله.

هغه مهال د پاکستانۍ ملېشو لخوا په تپل شوې ډیورنډ کرښه باندې د اغزن تار غځولو پر وړاندې افغان سرحدي ځواکونو خپل لومړی درجه چمتووالی نیول شوی ؤ او که د پاکستاني ملېشو لخوا په دغه سیمه کې د اغزن تار غځول پیل شوي وی، افغان دفاعي او سرحدي ځواکونه به پرې برید کړی ؤ.

خو په ورته وخت کې په ختیځ زون کې د سرحدي ځواکونو قومندان محمد ایوب حسن خېل وایي چې ځواکونو یې د ډیورنډ کرښې په اوږدو کې هېڅکله هم پاکستاني ملېشو ته د وړاندې راتګ اجازه نه ده ورکړې او زیاتوي چې په کونړ ولایت کې ډېی وخت د افغان او پاکستاني ځواکونو تر منځ بریدونه شوي دي او دغه ولایت په وار وار په هغو سیمو چې د پاکستان تر کنټرول لاندې دي، تر توغندیزو بریدونو لاندې راغلې دي.