ایران سره د لانجو په درشل کې د هرات والي له ایراني قونسل سره ولیدل

خبریال وېب پاڼه/ د هرات والي سید وحید قتالي له ایراني قونسل جنرال محمد صدیقي سره لیدلي او په یو لړ اړینو موضوعاتو یې سره بحث کړی.

په دې لیدنه کې دواړو لوریو، د هرات -خواف د اوسپنې لارې د درېیمې برخې په جوړېدو، د اقتصادي همکاریو پیاوړتیا ته پاملرنه په ځانګړې توګه د ایران او افغانستان د ګډې پولي ولایتونو سره او په یو لړ نورو مهمو موضوعاتو خبرې وکړې.

ایراني قونسل جنرال محمد صدیقي ایران ته د افغانستان د بهرنیو چارو وزارت سرپرست په مشرۍ د افغان پلاوي د بریالي سفر او په دې کې له یو لړ هوکړو څخه یادونه وکړه او هیله یې وښوده چې دا سفر د دواړو هېوادونو د همکاریو د پیاوړتیا لپاره یو نوی فصل اوسي.

د هرات والي سید وحید قتالي د هرات-خواف د اوسپنې لار دواړو هېوادونو تر منځ د اقتصادي او سوداګریزو اړیکو په برخه کې مهمه یاده کړه او ډاډ یې ورکړ، چې د هرات سیمه اییز حکومت به د دې لارې د عملیاتي کارونو لپاره لازم او چټک اقدامات وکړي.

په دې ناسته کې همدارنګه د روغتیا او درملنې په برخه کې د هرات او مشهد ولایتونو ترمنځ پر ګډې همکارۍ او همدارنګه ناروغانو ته د عاجلو روغتیایي خدماتو پر برارولو بحث وشو.

دا په داسې حال کې ده، چې څو ورځې وړاندې د بهرنیو چارو وزارت سرپرست محمد حنیف اتمر په مشرۍ افغان پلاوي ایران ته سفر درلود او هلته یې له ایرانیو چارواکو سره د افغان کډوالو پر وضعیت، سیمه اییزې همکارۍ او ورته موضوعاتو بحث درلود او یو لړ هوکړې یې هم لاسلیک کړې.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More