بل څراغ ولسوالۍ کې يوه مياشت کېږي چې اوربند دی

له تیرې يوې مياشتې را په دې  خوا د فارياب ولایت په بل څراغ ولسوالي کې طالبانو توپکونه ايښي دي او د عامو وګړو غوندې په کليو او بازارونو کې ګرځي.
بل څراغ ولسوالي په تېرو مياشتو کې شديدو ناامنيو پر سر اخيستې وه او وخت ناوخته به ورڅخه د وژنو، بريدونو او نښتو خبرونه را رسېدل.
د بل څراغ د ناامنيو وروستۍ پېښه د دغې ولسوالي پر ودانۍ د طالب ترهګرو جبه‌يي بريدونه وو چې څه باندې يوه مياشت وړاندې وشول.
په دغو بريدونو کې د بل څراغ په طالبانو سربېره، د ورڅېرمه ولسواليو طالبانو هم برخه اخيستې وه او تر درنې جګړې وروسته بل څراغ سقوط او د طالبانو لاس ته ولوېده.
سرخط ورځپاڼې ته له سيمې د رسېدليو مالوماتو په اساس، بل څراغ څو ورځې د طالبانو په ولکه کې وه او د ژوند چارې پکې په ټپه ولاړې وې، خو اوونۍ وروسته سرتېريو عمليات وکړل او ولسوالي يې بېرته له طالبانو پاکه کړه.

د سيمې اوسېدونکيو وايي دي چې طالبان په جګړه کې مات شول، خو بېرته يې د ترپ او خرپ بريدونو ته مخه کړه او په ولسوالي کې به يې پر سرتېريو او حکومتي وداني غلچکي بريدونه کول.
دا اوربند په داسې وخت کې کیږي چې د مفتي هدايت الله هدايت په نامه د سيمې يو ديني عالم او مخور د منځګړي په توګه راپورته کېږي او د طالبانو تر واک لاندې سيمو ته ورځي.او هلته ناسته کوي.
د راپورنو په اساس په دغه ناسته کې پرېکړه کېږي چې هيڅ لوری به پر مقابل لوري ډزې نه کوي، خو که مقابل لوري بريد وکړ، اوربند مات دی او بل لوری به د ځان دفاع کوي.
په دې سربېره، طالبانو ته اجازه ورکول شوه چې کولای شي په خلاصه پښه ښارونو ته لاړ شي او د ژوند اړتياوې پوره کړي.

د معلوماتو له مخې په غونډه کې دواړو غاړو موافقه وکړه چې طالبان که ښارونو ته ځي؛ نو د عامو وګړيو په توګه به ځي، وسلې به له ځان سره نه وړي او سرتېري که يې وپېژني هم چې طالبان دي، څه به نه ورته وايي.
اوس تقريباً مياشت پوره کېږي چې په دغه ولسوالي کې اوربند دی او ښکېلې غاړې پر يو بل بريدونه نه کوي.
که څه هم د دغه اوربند ټاکلې نېټه نه ده مالومه چې تر څه وخته به دوام لري، خو اوس د سيمې اوسېدونکي اندېښنه لري چې هسې نه د هېواد په کچه د حکومت او طالبانو تر منځ د شوي اوربند د وخت له پوره کېدو سره، د دوی په سيمه کې هم جګړې پيل شي.
بل څراغ د فارياب يوه له ګڼ‌مېشتو ولسواليو څخه ده چې په دوه زره شپږم کال کې يې د اوسېدونکيو شمېر يو څلوېښت زره، اووه سوه او شپږ تنه ښوول شوی و.
د یادولو ده چې ولسمشر غني څو ورځې وړاندې په يوه ويډيويي وينا کې د روژې له اووه ويشتمې، د کمکي اختر تر پنځمې په ټول هېواد کې له طالبانو سره اوربند اعلان کړ، سرتېريو ته يې امر وکړ چې په دغو ورځو کې پر طالب وسله‌والو بريدونه او عمليات نه کوي.