1 عمران خان: د منظور پښتين غوښتنې سمې، لاره غلطه ده | | Khabarial - Breaking News From Afghanistan
کور پاڼه / نړۍ / عمران خان: د منظور پښتين غوښتنې سمې، لاره غلطه ده

عمران خان: د منظور پښتين غوښتنې سمې، لاره غلطه ده

د تحريک انصاف ګوند مشر عمران خان ويلي دي، چې د منظور پښتين او پښتون ژغورنې غورځنګ غوښتنې سمې دي، خو لار يې غلطه ده.

نوموړي په پاکستان کې له رسنيو سره په خپلو خبرو کې ويلي دي، چې پوځ کله هم د خپلو خلکو پر وړاندې جنګ ته نه لېږل کېږي، او چې کله تاسو پوځ ولېږئ، نو بيا د بشري حقونو د سرغړونې خبرې کول نه دي پکار.

هغه وويل، نن چې د پښتون ژغورنې غورځنګ ځوانان پوځ ته بد رد وايي، هغوى په دې نه پوهېږي چې پوځ قبايلي سيمو ته ولېږل شو، نو دا خو به کېدل. هغه وايي چې هلته په کليو کې ترهګر پټ و او پوځ ته دا نه معلومېدل چې څوک ترهګر دي او څوک نه دي، نو حتمي خبره ده چې د بشري حقونو څخه به سرغړونې کېدې.

هغه زياتوي، چې د پښتون ژغورنې غورځنګ مشر منظور پښتين ځينې غوښتنې سمې دي، ما په خپله د ٢٠٠٣ کال څخه د قبايلي ځوانانو د ورکېدو په اړه غږ اوچت کړى دى، خو دا پخوانۍ خبرې دي، اوس مهمه خبره دا ده چې قبايلي ولس بېرته پر ځاى کړل شي.

هغه وايي چې ما د پښتون ژغورنې غورځنګ مشر منظور پښتين ته وويل، چې ستاسو له خوا به د پوځ مشر قمر جاوېد باجوه سره خبرې وکړم، ستاسو غوښتنې سمې دي، خو ستاسو لار سمه نه ده او ماسره دا اندېښنه ده، چې دښمن ته مو ګټه ونه رسېږي.

کله چې په اسلام اباد کې د پنجاب يوه ترهګر خادم رضوي لاريون راويستى و او د حکومت پر ضد يې شعارونه ورکول او په نواز شريف يې د کفر فتوې لګولې، نو هغه وخت پوځ وويل، چې دوى د خپلو خلکو پر وړاندې عمليات نه شي کولاى، نو حکومت يې دې ته مجبور کړ، چې د خادم رضوي خبرې ومني او پوځ په خپله اسلام اباد ته راغلو ټولو خلکو ته د کرايه پېسې ورکړې، چې کورونو ته لاړ شي.

خو بلخوا يې بيا په قبايلي سيمو کې پښتانه ووژل، بې عزته کړل، وې لوټل او هر څه چې يې په وس پوره وه هغه يې ورسره وکړل، همدا راز يې له قبايلي سيمو او سوات څخه په زرګونو شمېر پښتانه زلمي او پېغلې اختطاف کړې، چې د ځينو يې بيا مړي وموندل شول او د پښتون ژغورنې غورځنګ د مشرانو په وينا له ٣٢٠٠٠ څخه ډېر اوس هم ورک دي.

د پاکستاني پوځ وياند د اسلام اباد پرلت نه وروسته ويلي و، چې منظور پښتين يو نر ځوان دى، خو بيا له هغې وروسته د پاکستان پوځ مشر جنرال باجوه وويل، چې دوى پلان شوي لاريونونه ترسره کوي، همدا راز بيا د پېښور قول اردو قوماندان وويل چې منظور پښتين د دوى خپل بچى دى او که غوسه هم وي، دوى به يې خبرې ته غوږ ږدي.

خو په دې ټوله موده کې د پښتون ژغورنې غورځنګ پر ضد د پاکستان پوځ او استخباراتو د پاکستان زنده باد مومنټ په نوم غونډې وکړې او په دغو غونډو کې يې د پښتون ژغورنې غورځنګ او منظور پښتين پر ضد په خلکو څرګندونې وکړې، همدا راز پوځ په خپله هم په منظور پښتين تورونه ولګول، چې د افغانستان او هند د استخباراتو له خوا تمويلېږي، له دې پرته په ټولنيزو رسنيو هم د پاکستان د پوځ او استخباراتو له خوا پراخ کمپاين وشو او د پاکستان په ډېر شمېر ښارونو کې د منظور پښتين او پښتون ژغورنې پر ضد انځورونه هم راځوړند شول او شعارونه ورکړل شول.

په پېښور کې د پښتون ژغورنې غورځنګ سره د خبرو اترو لپاره جوړه شوې جرګې چې کله د منظور پښتين سره خبرې وکړې، نو له هغې وروسته منظور پښتين وويل، چې د حکومت او ولس ترمنځ آيين وي، خو پوځ چې موږ سره مخامخ خبرې کوي، د دې همدا لامل دى، چې دوى موږ خپل نه، بلکې خپل دښمنان ګڼي، ځکه داسې خبرې له دښمنانو سره کېږي، خو موږ د آيين خبره کوو.منظور پښتينعمران خان چې وايي، چې د منظور پښتين غوښتنې سمې، خو لاره غلطه ده، د دې لامل دا دى چې په پاکستان کې د پوځ او استخباراتو پر ضد هېڅوک خبرې نه شي کولاى، که هر چا د دوى پر ضد خبرې وکړې، نو بيا هغه کس ورکېږي يا هم وژل کېږي، خو په لومړي ځل په زرګونو خلکو په غونډو کې د پاکستان پوځ او استخباراتو ظلمونه بيان کړل، هغوى يې قاتلان، ظالمان، غله او لوټماران ياد کړل.

Loading...

بیا وګوره

ډنمارکۍ وزيره: روژه په خوله مسلمانان د ټولنې لپاره خطرناک دي

د ډنمارک هېواد د کډوالو وزيرې پر يوه بيان باندې خلک ډېر غوسه دي. نوموړې …

هندي پوځيانو په سرحد يو پاکستانى پوځي هلاک کړى

د پاکستاني او هندي پوځيانو ترمنځ وخت نا وخت په سرحدي سيمه نښته کېږي، چې …