کور پاڼه / بريا او پرمختګ / د نړۍ ٨ پياوړې مېرمنې؛ چې د خپلو هېوادونو مشري کوي

د نړۍ ٨ پياوړې مېرمنې؛ چې د خپلو هېوادونو مشري کوي

په روان کال (٢٠١٨) کې د هغه پياوړو ښځو شمېر لس دى، کومې چې د خپلو هېوادونو لومړۍ وزيرې دي، دا شمېر بيا په تېر کال (٢٠١٧) کې ٧ و، همدا راز د وخت په تېرېدو سره د ښځو په پياوړتيا او مهمو څوکيو ته يې راتګ ډېرېږي. د نړۍ په ١٣٧ هغه کسانو کې، چې د خپلو هېوادونو مشري ور په غاړه ده، اوس لس پياوړې ښځې هم دي، چې د خپلو هېوادونو لومړۍ وزيرې دي.

که څه هم په افغانستان کې کومه مېرمن د ولسمشرۍ څوکۍ ته نه ده رسيدلې، خو په تېرو اولس کلونو کې يو شمېر پياوړې ښځې سياست ته راغلي دي، چې که يوې خواته يې په پارلمان کې د خپلو خلکو استازولي کړې ده، نو بلخوا يو شمېر ښځو د وزارتونو په څوکيو هم دندې ترسره کړي دي.

خو دلته د ٨ هغه پياوړو ښځو په اړه درسره معلومات شريکوو، چې د خپلو هېوادونو مشري ورپه غاړه ده.

١-: اماندلا ساره کوګون ګيلوا؛ د نميبيا لومړۍ وزيره:

کوګون ګيلوا په اقتصاد کې تر ماسټرۍ کچې پورې زده کړې کړي دي او په خپل هېواد کې د ماليې وزارت وزيره هم پاتې شوې ده، نوموړې له ٢٠١٥ کال راهيسې د لومړۍ وزيرې په توګه دنده ترسره کوي. نوموړې د ماليې په وزارت کې خپله وړتيا ښکاره کړې وه او د نميبيا هېواد يې په اقتصادي کچه په خپلو پښو ودرولى دى.

٢-: شېخ حسينه واجد؛ د بنګله دېش لومړۍ وزيره:

د بنګله دېش د خپلواکۍ اتل شېخ مجيب الرحمان، چې د پاکستان په څېر ظالم هېواد څخه يې خپلواکي ترلاسه کړه او د بنګله دېش په نوم يو نوى هېواد جوړ شو. د شېخ مجيب الرحمان لور او د ولسي ګوند مشره شېخ حسينه واجد، چې د ډهاکې مېرمن هم ورته ويل کېږي، اوس مهال ٦٣ کلنه ده او د ولس د مينې کچه يې له دې معلومولاى شئ، چې درېيم ځل د بنګله دېش لومړۍ وزيره ده.

په ٢٠١٧ کال کې فوربس مجلې د نړۍ په ١٠٠ پياوړو مېرمنو کې هم شامله کړې وه. نوموړې د روهينګيا د مسلمانو د وژنې په اړه هم غږ پورته کړى او د روهينګيا مسلمانو ته يې په خپل هېواد کې ځاى ورکړى دى، همدا راز يې له ميانمار هېواد څخه غوښتي، چې په دغه هېواد کې دې د مسلمانو وژنې بندې کړي.

نوموړې د خپل هېواد لپاره ستر کارونه ترسره کړي دي او هېواد يې د پرمختګ پر لور بيولى دى، همدا راز په بنګله دېش کې يې ښځې پياوړې کړي دي او حسينه واجد د بنګله دېش د مېرمنو په زړونو کې ځاى لري.

٣-: جيسيندا آرډرن؛ د نوي زيلانډ لومړۍ وزيره:

اغلې جيسيندا د ٣٣ کلونو په عمر کې د اکتوبر په ١٩مه، کال ٢٠١٧ د نوي زيلانډ لومړۍ وزيره شوه، چې د تر ټولو کم عمرې لومړۍ وزيرې اعزاز يې هم په خپل نوم کړى دى. نوموړې په ټولنيزو رسنيو، بيا په ځانګړې توګه په ټويټر ډېره فعاله ده او د نوي زيلانډ ولس په زړونو کې ده، نوموړې د نوي زيلانډ لپاره ډېر کارونه ترسره کړي دي.

٤-: کيټرن جيکبس دوتوير؛ د آيس لېنډ لومړۍ وزيره:

کيټرن ډېره زيارکښه او تکړه مېرمن ده، چې د ٢٠١٧ کال د نومبر له مياشتې راهيسې د اروپايي هېواد آيس لېنډ لومړۍ وزيره ده. نوموړې د ٢٠٠٩ کال د فرورۍ څخه بيا تر ٢٠١٣ کال د ٢٣ مۍ پورې په آيس لېنډ کې د پوهنې او ساينس او ټېکنالوژۍ په توګه هم دنده ترسره کړې ده. نوموړې د مېرمنو د پياوړتيا لپاره ډېر زيار باسي.

٥-: ايرنا سولبرګ؛ د ناروې لومړۍ وزيره:

ايرنا بيا د کنزرويټيو ګوند مشره ده، چې د ځايي حکومت او سيمه ييز پرمختګ وزيره هم پاتې شوې ده، نوموړې بيا له ٢٠١٣ کال راهيسې د ناروې لومړۍ وزيره ده او په ٢٠١٤ کال کې د کنزرويټيو ګوند مشري هم ورپه غاړه شوې ده. نوموړې د کډوالو لپاره ډېر سخت قانون جوړ کړى دى او په دې لړ کې يې يو شمېر بدلونونه هم راوستي.

٦-: اينا برنابک؛ د سربيا لومړۍ وزيره:

برنابک د سربيا لومړۍ مېرمن ده چې په دغه هېواد کې د لومړۍ وزيرې څوکۍ ته ورسېده، نوموړې په ٢٠١٧ کال کې لومړۍ وزيره شوه، له دې مخکې اغلې د عامه او سيمه ييزې ادارې وزيره هم پاتې شوې وه. نوموړې د حکومتي خدماتو د پياوړتيا لپاره اي ګورننس هم په خپل هېواد کې فعال کړ، چې د سربيا د ولس ژوند ورسره پرمختګ وکړ او حکومتي خدمات په ډېرې اسانۍ او چټکۍ سره مخ پر وړاندې لاړل.

٧-: تيريزامې؛ د برېتانيې لومړۍ وزيره:

تيريزامې د کنزرويټيو ګوند غړې ده، چې مخکې يې د کورنيو چارو د سيکرترې په حېث او د مېرمنو د وزيرې په توګه دنده ترسره کړې ده، نوموړې له ٢٠١٦ کال راهيسې د برېتانيې لومړۍ وزيره ده. تيريزامې د نشه يي توکو، کډوالو او د کورنيو د بې ځايه کېدو په اړه چې کارونه کړي دي، د برېتانيې ولس ورته ډېر په درنه سترګه ګوري.

٨-: مرسډيز اراوز؛ د پيرو لومړۍ وزيره:

مرسډيز بيا د جنوبي امريکا د پيرو هېواد لومړۍ وزيره ده، چې له ٢٠١٧ کال راهيسې لومړۍ وزيره او د لومړي وزير د دوهمې مرستيالې په توګه يې هم دنده ترسره کړې ده، نوموړې د رشوت او فساد پر ضد سخته مبارزه کړې ده او د خپل هېواد په پرمختګ کې يې مهم رول ترسره کړى دى.

نوموړې په اقتصادي ډګر کې ډېره پوهه لري او همدا لامل دى، چې هېواد يې اوس د نړۍ ٤٨م اقتصادي هېواد دى.

Loading...