د حق غوښتنې کور کې هم بډې اخیستونکي ونیول شول

خبریال وېب پاڼه/د افغانستان په اداراتو کې د فساد خبره کومه نوې خبره نه ده خو دا چې د حق غوښتنې په کور (لویه څارنوالۍ) کې بډې لاس په لاس کېږي، کم راپورونه یې ورکول کېږي.

د لویې څارنوالۍ مسؤلین وایي چې د خپلې ادارې ۴ کسان یې د بډو اخیستو په کور نیولي دي.

په نورو اداراتو د بډو او رشوت اخیستل نوې خبره نه ده خو په عدلي او قضایي ارګانونو کې د دا ډول پېښو خبرونه کم ورکول کېږي. تر دې د مخه هم د عدلي ارګانونو ځینې کسان د فساد او بډو اخیستو په تور نیول شوي وو.

د لویې څارنوالۍ مسؤلین وایي، د یادې څارنوالۍ څلور کارکوونکي د فساد او بډو اخیستو په تور د کنټرول او مراقبت څارنوالۍ لخوا په ننګرهار او کابل کې نیول شوي دي.

د حق غوښتنې په کور یا څارنوالۍ کې د بډو اخیستو په تور داسې مهال د څلورو کارکوونکو د نیول کېدو خبر ورکول کېږي چې څه موده وړاندې په یوه بله دولتي اداره کې هم د ۲۰۰ زره امریکایي ډالرو سره یو ځای دوه کسان نیول شوي وو.

ویل کېږي دغه څلور کسان د کنټرول او مراقبت څارنوالۍ لخوا په ننګرهار او کابل کې نیول شوي دي.

لویې څارنوالۍ په خپله خپره شوې خبرپاڼه کې ویلي دي چې، د کنټرول او مراقبت څارنوالۍ څو ورځې وړاندې په ننګرهار کې یو څارنوال د ۲ زره ډالرو او نن یې د ننګرهار د لعل پورې ولسوالۍ د څارنوالۍ امر د ۳۶ زره افغانیو بډو په تور نیولي چې دوسیې یې تر څېړونو لاندې دي.

د لویې څارنوالۍ خبرپاڼه زیاتوي چې د کابل شکر درې ولسوالۍ د ابتدایه څارنوالۍ امر او اداري مدیر چې د قتل د یوې قضیې په اړه یې څېړنې کولې له متضررینو د درې زره ډالرو بډو غوښتنې په تور نیول شوي دي.

سرچینه کې همداراز راغلي چې د کنټرول او مراقبت څارنوالۍ له ۱۳۹۸ کال راهیسې د فساد، بډو او نورو جرمونو په تړاو د خپلو کارکونکو ۳۸ قضیې څېړلې او په تړاو یې زیات شمېر کسان نیولي دي.

څه موده وړاندې د نورم او ستندرد ملي ادارې مشر د خپلو درېیو کارکونکو سره یو ځای  د ۲۰۰ زره ډالرو بډو اخسیتو په تور نیول شوي وو.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More