The news is by your side.

د (سرکټ) په رول کې دا ځل د ارشد په ځاى رنبير راځي

رنبير کپور په خپل نوي فلم ((سنجو)) کې ډېر ښه کار کړى دى، چې هر ځاى يې صفتونه روان دي، خو اوس تازه خبر دا دى چې د مشهور فلم ((منا بهايي)) د راروانې برخې څخه ارشد وارثي وويستل شو او د هغه پر ځاى رنبير کپور واخيستل شو.

د يو شمېر ناکامو فلمونو ورکولو نه وروسته د رنبير کپور په برخه ((سنجو)) راغى چې د کاميابۍ بام ته ورسېده او اوس هر فلم جوړونکى هڅه کوي چې رنبير کپور په خپل فلم کې واخلي. خو اوس تازه خبر دا دى چې د ((منا بهايي)) په راروانه برخه کې د ارشد وارثي په ځاى د سرکټ رول رنبير کپور ترسره کوي.

هندي رسنۍ ليکي، چې راجمکمار هيراني د خپل مشهور فلم ((منا بهايي)) په دريمه برخه باندې کار پيل کړى دى او سرچينې وايي چې په دې فلم کې د سرکټ د رول لپاره دا ځل رنبير کپور انتخاب شوى دى.

ياده دې وي چې د رنبير کپور ((سنجو)) فلم هم راجکمار هيراني جوړ کړى دى، همدا راز رنبير کپور نن سبا د ((براهمسترا)) فلم په ريکارډنګ کې بوخت دى، چې له هغې وروسته به بيا د يش راج فلمي شرکت په ((شمشيرا)) فلم کې هم کار کوي.