بریتانیا په را روانه میاشت کې د HIV درمل بازار ته وړاندې کوي

خبریال ډاټ کام/د COVID_19 وبا ناروغۍ په دې ترهېدلې نړۍ کې تازه د بریتانیا د عامې روغتیا وزارت اعلان کړی دی چې د را روانې اپریل میاشتې په لړ کې به د اېچ آی وي د مخنیوي لپاره بازار ته نوی درمل وړاندې کړي.

د پرېپ په نوم درمل چې د نا خوندي او ناببره جنسي اړیکو لپاره په ورځ کې یو ځل وخوړل شي، د اېچ آی وي (ایډز) د لېږدېدو مخه نیسي. د بریتانیا د عامې روغتیا وزارت د بیان له مخې د دې درمل کارونه کولی شي په راتلونکو لسو کلونو کې د اېچ آی وي ویروس نوې قضیې ختمې او په ټپه ودروي.

په بریتانیا کې څه باندې یو لک کسان په اېچ آی وي اخته دي. د یاد هېواد د روغتیا پالانو په وینا په دغه هېواد کې کابو ۷ سلنه کسان په دې لا خبر نه دي چې دوی دې پر اېچ آی وي ویروس اخته شوي وي. هېره دې نه وي چې یاد شوی درمل یوازې د ایډز ناروغۍ د لېږد مخه نیسي او د نورو ناروغیو د لېږدېدو مخه نه نیسي.

له دې وړاندې په ۲۰۱۸ کال د جولای میاشت کې امریکا کې د یاد شوي ویروس واکسین جوړ شوي وو چې د اېچ آی وي پر وړاندې د وجود معافیت یې پیاوړی کاوه. په ټوله نړۍ کې تر ۳۷ ملیونه زیات وګړي پر اېچ آی وي ناروغۍ اخته دي. په افغانستان کې د ۲۰۱۷ کال ملي پروګرام د موندنو له مخې په اېچ آی وي ویروس د اخته کسانو ۷۵۰۰ مثبتې پېښې ثبت شوې وې.

که څه هم په افغانستان کې د ایډز ناروغي یو ډول عیب بلل کېږي او ورباندې اخته کسان یې له شرمه نه افشا کوي خو وقایوي درملنه یې کېدی شي. په افغانستان کې د اېچ آی وي پینځه مرکزونه او ۱۱ د مشوره ورکولو مرکزونه فعالیت کوي خو د جراحۍ لپاره مناسب وسایل نه لري چې دې ستونزې پر همدې ناروغۍ د اخته کسانو اندېښنې لا پسې زیاتې کړې دي.

په لویدیځه نړۍ کې پر دغه ویروس د اخته کسانو شمېر خورا زیات دی. د جوړ شوي تازه درمل پر وړاندې هم یو شمېر کسان نیوکه کوي او وایي چې که دا ګولۍ عامې شي نو د جنسي اړیکو پر مهال به خلک بې احتیاطي کوي او ښایي په دې سره د کانډوم کارول هم محدود شي.

دوی وړاندې وایي چې د دا ډول یو ذهنیت له امله د نورو نه رغېدونکو ناروغیو لپاره لار هوارېږي.