fbpx

پارلمان د فساد ځای دی

رمضان بشردوست وايي چې پارلمان له خپلو قانوني صلاحیتونو استفاده نه کوي نو ځکه په ټول هېواد کې د ستونزو او بدمرغیو سرچینه همدې ځای دی.

د ولسي جرګې غړي رمضان بشردوست نن د دغه غونډې په امتیازي ساعت کې د خبرو پر مهال وویل، چې پارلمان له خپلو قانوني صلاحیتونو استفاده نه کوي نو ځکه په ټول هېواد کې د ستونزو او بدمرغیو سرچینه له همدې ځایه پیل شوې ده.

 د ده په خبره د ولسي جرګې غړي د پیسو په بدل کې داسې خلکو ته د باور رایه ورکوي او د وزارت تر څوکۍ یې رسوی، چې دوی غیر مسلکي دي او د چارو د مخ ته بېولو وړتیا نه لري. دده په باور که امنیتي ادارې کمزورې دي علت یې ولسي جرګه ده، چې د باور رایه یې ورکړې ده.

هغه د ولسي جرګې پر مشر غږ وکړ، چې قانون پلی کړي او د اوړنیو رخصتیو پر ځای دې په کابینه کې د سرپرستۍ د ختمولو لپاره هڅه وکړي. نوموړي همدا راز یاته کړه، چې پارلمان د ولسمشر د محاکمې صلاحیت لري، خو کمزوري مدیریت یې دا صلاحیت له منځه وړی دی.

 د ولسي جرګې غړو همدا راز په پنځمه حوزه کې د پرونیو راکېټونو لګېدلو ته په اشارې ویلي، چې امنیتي ادارې کمزورې دي او په هېواد کې د روان وضعیت په اړه هېڅ ډول استخباراتي معلومات نه شي ټولولی. وکیلانو دا غوښتنه هم لرله چې د امنیتي ادارو مشران باید ولسي جرګې ته ور وبلل شي.