د کرېکټ بورډ چارواکو د نجیب تره کي اتلولۍ او لاسته راوړنې ولیکلي

خبریال وېب پاڼه/ د افغانستان د کرېکټ بورډ چارواکو په یوه کتاب کې د هېواد لپاره د شهید نجیب تره کي اتلولۍ، لاسته راوړنې او خاطرې ولیکلې.

د کرېکټ بورډ چارواکو نن د کرېکټ بورډ په اداره کې د نجیب تره کي پر مړینې د ادارې چارواکي او کار کوونکي را ټول شوي وو او د نجیب تره کي عکس ته یې ګلونه کېښودل.

د کرېکټ بورډ اجرایوي رییس نظیم جار عبدالرحیمزي، د کرېکټ بورډ ادارې ویاند فرید هوتک، د ملي لوبډلې لوبډلمشر اضغر ستانکزي، ملي لوبغاړي ګلبدین نایب او یو شمېر نورو لوبغاړو او ا کرېکټ بورډ چارواکو د نجیب تره کي د مړینې له کبله د هغې کورنۍ، دوستانو او مینه والو سره خواخوږي وکړه او د تره کي پر مړینه یې خواشینې وښوده او لویه ضایعه یې یاده کړې.

دوی د تره کي عکس ته ګلونه کېښودل او د تره کي اتلولۍ، لاسته راوړنې، خاطرې او یادونه یې د کتاب په ډول د هېواد راتلونکو نسلونو لپاره ولیکل.

د افغانستان د کرېکټ ملي لوبغاړی نجیب تره کی د جمعې پر ورځ په جلال اباد کې په یوه ټرافیکي پېښه کې سخت ژوبل شوی وو او په روغتون کې د څو ورځو له بستر نه چې د کوما په حالت کې وو، پرون(سه شنبه تلې ١٥مه) په روغتون کې ساه ورکړه.

تره کي د افغانستان لپاره د کرېکټ په ملي لوبډله کې ښه لوبېدلی وو او ډېرې لاسته راوړنې یې درلودې.

نجیب الله تره کی پرون د یوې لوی جنازې په ترڅ کې چې د کرېکټ بورډ چارواکو، لوبغاړو او حکومتي چارواکو هم په کې ګډون درلود، ننګرهار ولایت کې په خپله پلرنۍ هدیره کې خاورو ته وسپارل شو.