جوماتونو کې د فاتحې مراسم وځنډول شول

د حج او اوقافو وزارت د کرونا ویروس د خپرېدو د مخینوي لپار په ټولو جوماتونو کې د فاتحې اخیستو مراسم ځنډولي .

د حج او اوقافو وزارت وزیر عبدالحکیم منیب وایي، دغه ګام یې د یو شمېر دیني عالمانو سره تر سلاه مشورو وروسته اخیستی دی.

د هغه په وینا د همدې پرېکړې پر اساس په ټولو خطیبانو غږ کوي، چې په جوماتو کې د فاتحې مراسم وځنډوي او له دې وروسته دې په جوماتونو کې باتحه نه اخستل کېږي.

دغه راز د حج او قافو وزیر له خلکو وغوښتل، چې د کرونا ویروس خپرېدو ته په کتو د حکومت او عامې روغتیا وزارت سپارښتنې عملي کړي.

نوموړي زیاته کړه، ټول خلک دې د ځان او ټولنې د خوندیتوب لپاره یو تربله له لاس ورکولو ډډه وکړي او هغه کسان چې زکام وي او د کرونا ویروس نښې نښانې په کې لیدل کېږي، د جماعت په لمونځونو کې دې ګډون نه کوي.

ښاغلي منیب د جوماتونو له امامانو او دیني عالمانو وغوښتل چې، د جمعې د لمانځه په خطبو کې د کرونا ویروس په اړه خلکو ته عامه پوهاوی ورکړي او نورو لمونځونو کې دې قرائتونه مختصر کړي.

په همدی حال کې افغان حکومت په هرات کې  کرونا د خپرېدو د مخینوی لپار د دغه ولایت لپاره څلور سوه میلیونه افغانۍ بودجه ځانګړې کړې ده.

ولسمشر غني د عامې روغتیا له وزیر ډاکتر فیروز الدین فیروز سره ویډیويي کنفرانس کې ویلي، چې حکومت د کرونا د کنټرول لپاره هرات ته ۴ سوه میلیونه افغانۍ ځانګړې کړې دي.

ښاغلي غني زیاته کړې، چې د دغه پیسو د لګښت او نظارت لپاره به یوه عالي شورا هم جوړه شي او دغه راز یې سپارښتنه کړې، چې د یاد ویروس د مخنیوي لپاره باید په هرات کې عملي او عاجل اقدامات تر سره شي.

دغه راز ولسمشر دا سپارښتنه هم کړې، چې په هرات کې باید د کرونا ویروس د خپرېدو د مخینوي په پار خلکو ته د عامه پوهاوي په برخه کې هم جدي اقدامات وشي.

د هرات لپاره د کرونا ویروس د مخینوي لپاره دغه پیسې په داسې حال کې ځانګړې کېږي، چې په دغه ولایت کې د کرونا ۱۳ مثبت پېښې ثبت شوې او د ټول هېواد په کچه دغه پېښې ۲۲ ته رسېدلي دي.

له هرات وروسته، په لوګر، کاپیسا، سمنګان، بلخ، دایکنډي او بادغس ولایتونو کې هم د کرونا مثبت پېښې ثبت شوې، چې همغه ۲۲ پېښو کې شاملې دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More