fbpx

کندهار کي پولیسو او وسله والو ته مرګ ژوبله اوښتې

د کندهار په ارغستان ولسوالۍ کی د پولیسو او وسله والو ترمنځ په جګړه کي له دواړو خواو دیارلس کسان وژل سوي دي.
دغه حمله تېره شپه ددې ولسوالۍ د نارین ویالې په سیمه کی سوې ده.
د کندهار د امنیې قوماندانۍ ویاند ضیا درانی وايي، چي وسله والو هلته پر دوو پوستو حملې کړي، خو د امنيتي ځواکونو له مقاومت سره مخ سوي.
هغه زیاته کړه، چي د څو ساعته جګړې پر مهال نهه وسله وال او څلور پولیس وژل سوي او شپږ وسله والو او دوه پولیس ټپیان سوي.
بلخوا د کندهار پولیسو د لومړۍ حوزې په مربوطاتو کي هغه کس وژلی، چي په تلاښۍ ولاړ پولیس يې د چاړې په وسیله حمله کړې.
دغه پېښه نن له غرمې مخکي یولس بجې د ولایت مقام او خرقې شریفي ترمنځ په کوڅه کي سوې ده.
ویل کیږي، چي یو بریدګر هلته پر ولاړ پولیس  د چاړې حمله کړې او سخت يې ټپي کړی دی، خو وروسته پولیس بریدګر ویشتلی او وژلی یې دی.

خپله وسله والو طالبانو تر اوسه د يادو پېښو په اړه څه نه دي ويلي