fbpx

هلمند کې له زیانمنو کورنیو سره مرسته وشوه

هلمند کې له هغو کورنیو سره مرسته وشوه چې د کورنۍ غړي یې په موټربم چاودنو، سړک غاړي ماین چاودنو او یا هم د جګړې پرمهال ژوند له لاسه ورکړی وي، او یا ژوبل شوي وي.

هلمند کې د کومک مرستندویه بنسټ له لوري د USAID په مالي ملاتړ له هغو کورنیو سره د مرستې لړۍ پيل شوې، چې د جګړو او یا چاودنو پر مهال یې د کورنۍ غړي وژل شوي او یا ژوبل شوي دي.

د دغه بنسټ استازي وايي، چې د مرستې د توزیع په اوسنۍ دوره کې یې دا ځل اته کورنۍ شاملي دي، چې هري کورنۍ ته د ۱۷ زره افغانیو معادل خوراکي او غیري خوراکي توکي ورکول کیږي.

د هلمند ولایت مرستیال مجاهدالله صفاري بیا وویل، ولایت مقام هڅه کوي د زیانمنو کورنیو د لاس نیوي په هدف د بیلابیلو لارو مرستې راجلب کړي.

نوموړي پر نورو مرستندویه بنسټونو غږ وکړ، چې د بې وزله او جګړه ځپلو کورنیو سره د مرستو لړۍ ته دوام ورکړي.

بل پلو هغه کورنیو چې مرستې یې ترلاسه کړي خوښ دي، خو وايي دغه مرستي ددوی لپاره بسنه نه کوي، له حکومت او مرستندویه بنسټونو څخه د لازیاتو مرستو غوښتنه کوي.

په هلمند کې د وسله والو طالبانو د جګړو له امله ګڼ شمیر کورنۍ له خپلو کورنو بې ځایه او یو شمیر نورو بیا د خپلو کورنیو غړي د لاسه ورکړي .