fbpx

د ګوګل کروم ١٠ خوندور پروګرامونه، چې ډېرى ترې ناخبره دي

که انټرنېټ کاروئ، نو د ګوګل کروم سره به حتمي بلد ياست، دا براوزر په ٢٠٠٨ کال کې جوړ او په کار يې پيل کړى و، چې ډېر ژر يې د خلکو پام ځان ته راواړوه او د فاير فوکس او انټرنېټ ايکسپلورر په څېر نور براوزرونه يې وروسته پرېښودل.

خو ډېرى خلک د ګوګل کروم په ځينو مهمو ځانګړتياوو يا پروګرامونو خبر نه وي.

ګوګل کروم ډېرى داسې ايکسټينشنز يا پروګرامونه لري، چې د کروم کارول پرې لا خوندور کېداى شي. تاسو د دوى په مرسته کولاى شئ ځينې ليکنې د لوست لپاره خوندي کړئ، نوې ژبه زده کړئ او نور ډېر څه شته، چې ګټه ترې پورته کولاى شئ.

مهمه خبره دا ده چې دا پروګرامونه په ګوګل کروم کې ډېر اسانه دي او ټول وړيا دي، يعنې نه وخت ضايع کېږي او نه هم پېسې.

ليکنې خوندي کول:

که کله تاسو په انټرنېټ کومه ليکنه راخلاصه کړئ او د لوستلو لپاره يې وخت ونه لرئ، خو ليکنه درته بيا مهمه ښکاري او غواړئ چې بيا يې په وزګار وخت کې ولرئ، نو د دې لپاره بيا تر ټولو اسانه لاره د پاکټ ايکسټينشن دى. Save to Pocket ايکسټينشن چې کله په ګوګل کروم کې انسټال کړئ، هر وخت هره ليکنه خوندي کړئ او بيا چې يې هر وخت او هر ځاى، يعنې موبايل، ټېبليټ يا کمپيوټر کې وغواړئ، لوستلاى يې شئ. کله چې هم په پاکټ کليک وکړئ، دا ليکنه به اتومات دا ايکسټينشن له ځان سره خوندي کړي.

نوې ژبه زده کړئ:ژبه

که له کومې بلې ژبې سره مينه لرئ او په دې هڅه کې يئ چې يې زده کړئ، نو د لينګويج امرسين ايکسټينشن بيا ستاسو لپاره ډېر خوندور پروګرام دى. تاسو کولاى شئ چې د کروم وېب سټور څخه Language Immersion for Chrome ايکسټينشن انسټال کړئ او کومه ژبه چې زده کول غواړئ، هغه پکې منتخب کړئ، له دې لارې په وکولاى شئ چې د يوې ژبې توري او جملې بلې ژبې ته ترجمه کړئ، دا تاسو په کور او په دفتر دواړو ځايونو کې ښه په خوند کارولاى شئ.

پينک بټن:

که چېرته تاسو په ګوګل کروم کې يو شمېر وېبپاڼې خلاصې کړي وي او دغه مهال مو خواته داسې يو کس راشي، چې تاسو نه غواړئ هغه پوه شي چې تاسو څه شى خلاص کړي دي، نو مجبور يئ چې هر څه بند کړئ، خو که يې نه غواړئ چې بند يې کړئ او هر څه همداسې پراته وي، خو د هغه له سترګو پناه شي، نو بيا تاسو د پينک بټن ايکسټينشن څخه ګټه پورته کولاى شئ. کله چې هم په پينک بټن باندې کليک وکړئ، ټول Tabs ورکېږي او د Bookmark تر څنګ يو بل نوى فولډر جوړېږي، چې ستاسو ټولې وېبپاڼې هلته خوندي وي، کله چې تاسو وغواړئ، ټولې بېرته راخلاصولاى شئ.

بريښناليک ته پاملرنه:

که تاسو ته د ورځې ډېر برېښناليکونه راځي، يا هم ځينې وخت داسې مهم برېښناليک راځي او يا بيا خپل برېښناليک هر وخت ګورئ او يا د نه کتلو له امله درنه وخت تېر شي، نو ستاسو لپاره د ګوګل مېل چيکر ايکسټينشن ډېر ګټور دى. دا ايکسټينشن ډېر ساده دى او چې کله يې انسټال کړئ، نو د ګوګل کروم کې درته د جي مېل برېښناليک نښه ښکاري او دا درته ښکاره کوي، چې څومره برېښناليکونه داسې دي، چې تراوسه پورې نه دي لوستل شوي، څنګه چې هم ورته نوى برېښناليک راځي، دغلته به تاسو ته معلومات کېږي، نو کولاى شئ چې هر وخت د نوي برېښناليک څخه ځان خبر کړئ.

اعلانونه بلاکول:

د اعلانونو بلاکولو لپاره تر ټولو زيات ښه او ډېر کارېدونکى ايکسټينشن د ايډبلاکر په نوم دى. د دې ايکسټينشن په مرسته تاسو کولاى شئ چې هر ډول اعلانونه بلاک کړئ او بيا چې هره وېبپاڼه تاسو راخلاصوئ، نو په هغې کې په اعلانونه تاسو ته نه راښکاره کېږي، ځکه ډېرى وخت د بېنر او پوپ اپ اعلانونه د يوه کس وخت خرابوي او توجه يې هم بل خوا اړوي، نو که تاسو له اعلانونو تنګ ياست، له دې ايکسټينشن څخه ګټه پورته کړئ.

ډېر ټېبونه کارول:ون ټېب

که کله تاسو په ګوګل کروم کې ډېر ټېبونه Tabs کاروئ، نو په هغې کې هر يو ټېب پېدا کول هم بيا ګران وي، نو د دې لپاره ون ټېب يو ډېر ښه ايکسټينشن دى، چې تاسو کولاى شئ ټول ټېبونه Tabs ته مو د يو ليسټ شکل وکرړئ او د وخت او تاريخ په ترتيب سره يې منظم کړئ. د دې يوه بله ګټه دا ده، چې د کمپيوټر ميموري به هم ډېره نه کارېږي.

کروم ريموټ ډيسک ټاپ:

کروم ريموټ ډيسک ټاپ يو ډېر زبردست ايکسټينشن دى، دا د دې لپاره کارول کېږي، چې تاسو د يو بل چا کمپيوټر ته له خپل کمپيوتر څخه ايکسس ترلاسه کړئ، يا هم بل څوک دې ته پرېږدئ، چې هغوى د خپل کمپيوټر له لارې ستاسو کمپيوټر ته لار پېدا کړي او کار پکې وکړي. که چېرته تاسو په دفتر کې يو فايل هېر کړى وي نو د ريموټ ډيسک له لارې يې ترلاسه کولاى شئ. دا د انټرنېټ له لارې کار کوي او سيکيورټي يې هم ښه ده.

د انځورونو پېژندنه:

سرچ باى اميج له لارې تاسو کولاى شئ چې د انځورونو شناخت ډېر په اسانه پېدا کړئ، دا اصلاً د ګوګل اميجز په څېر يو ايکسټينشن دى، چې هر انځور پکې تاسو په ګوګل کې پلټلى شئ، چې دا انځور اصلاً د کوم ځاى دى. دا د ناپېژانده ځايونو په پېدا کولو کې ډېره مرسته کوي.

موبايل کروم:

کروم ټول موبايل ايکسټينشن له لارې تاسو په هر ځاى کې د دفتر کارونه ترسره کولاى شئ. دا ايکسټينشن ستاسو د ډيسک ټاپ براوزر تجربه ستاسو ځيرک ټيليفون د وېبپاڼو په مرسته انتقالوي، دا ايکسټينشن پرته له انټرنېټ څخه هم کار کوي.

له ګرامري تېروتنو ځان وساتئ:ګرامرلي

که چېرته ليکل کوئ او د ګرامر سره ډېره ستونزه لرئ، يعنې له تاسو څخه په ليک کې د ګرامر ډېرې تېروتنې ترسره کېږي، نو بيا ستاسو لپاره د ګرامرلي ايکسټينشن ډېر ګټور دى. دا نه يواځې دا چې ستاسو توري سموي (سپيلينګ) بلکې ستاسو جملې هم درسموي. دا نه يواځې په جيمېل او وېبپاڼې، بلکې په ټولنيزو رسنيو کې هم کار کوي او ستاسو تېروتنې درسموي.

ژباړه : رحمت ديوان