له پرون راهیسې کندهار کې ۶۹ تنو طالبانو ته مرګ ژوبله اوښتې

خبریال وېبپاڼه/ د کندهار چارواکي وايي، په تېرو ۲۴ ساعتونو کې ملي، امنیتي او دفاعي ځواکونو د ځمکنیو او هوايي عملیاتو پر مهال په دې ولایت کې ۶۹ وسله والو طالبان ته مرګ ژوبله اوښتې ده.

د کندهار نظامي شورا د یوې خبرپاڼې په خپرولو ویلي، دغه عملیات د دې ولایت په ارغنداب، شاه ولیکوټ پنجوايي او ژړۍ ولسوالیو کې ترسره شوي دي، چې په نتیجه کې یې ۶۵ وسله وال طالبان وژل شوي او ۴ نور مرګوني دي.

خبرپاڼه زیاتوي، په یادو تصفیوي عملیاتو کې د وسله والو طالبانو دوه عرادې نقلیه وسایط، ۵ کړۍ ماینونه، شپږ پټنځایونه، یو میل دهشکه، یو میل راکټ او یو شمېر نور تجهیزات هم له منځه وړل شوي دي.

د خبرپاڼې په حواله، په یادو عملیاتو کې ملي، امنیتي او دفاعي ځواکونو ته هیڅ ډول تلفات نه دي اوښتي او د ترهګرو د ځپلو په موخه ګډ تصفیوي عملیات په شدت دوام لري.

د چارواکو په خبره، دغه عملیات د ارغنداب ولسوالۍ تر تصفیې وروسته د (بابا صاحب) ګډو نظامي عملیاتو د دوهم پړاو یوه برخه وه، چې د وسله والو مخالفینو د ځپلو په موخه پیل شوي دي.

خو وسله وال طالبان بیا له خپله اړخه په جګړه کې د پرمختګ خبره کوي او وايي چې یو ځل بیا یې د ارغنداب، ژړۍ، میوند او پنجوايي ولسوالیو یو شمېر کلي نیولي او ګڼ شمېر سرتېرو ته یې مرګ ژوبله اړولې ده.

په کندهار کې د وروستیو جګړو له امله له بېلابېلو ولسوالیو زرګونه کورنۍ ښار ته ګډه شوې دي، چي د سرپناه ځایونو د نشتون ترڅنګ له سختو اقتصادي ستونزو سره لاس او ګریوان دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More