فضل محمود فضلي پرانيستې دولت داري به ملت او دولت نېږدې کړي

فضل محمود فضلي پرانيستې دولت داري به ملت او حکومت نېږدې کړي

خبريال وېبپاڼه/ فضل محمود فضلي د ولسمشر سلاکار وايي چې پرانيستې دولت داري به د ولس او دولت فاصله له منځه يوسي او په حکومت باندې به د خلکو باور زيات شي، فضلي چې د فساد سره مبارزې په هکله يې خبرې کولې وويل چې دداسې يو سيستم څخه چې پکې معلوماتو او حساب ته د خلکو لاسرسی کم وي بايد بهر شو او داسې يو تګلاره خپله کړو چې خلک پخپله په عام ډول د حکومت له چارو او حسابونو څخه خبر وي.

د ملت او حکومت نیږدې والی
د ولسمشر سلاکار پخپلو خبرو کې دې ته پکي په تکرار سره اشاره وکړه چې پرانيستې دولت داري به د ولس او حکومت ترمنځ فاصله ختمه کړي، فضلي په داسې حال کې د ولس او حکومت ترمنځ د رابطې د راکمولو هڅه کوي چې خلک د حکومت څخه خوابدي دي، خدماتو ته نه لاسرسی، د سرچينو بې انډوله وېش، د چارواکو بې پروايي، دداسې يو سيستم نشت والي چې خلک پخپله د حکومت کړه وړه او مصارف وڅاري ددې سبب شوي چې خلک له حکومت څخه فاصله ونيسئ.

د خلکو باور او هيلې
فضل محمود فضلي په خپلو خبرو کې ددې يادونه هم وکړه چې پرانيستې دولت داري او ملت ته حساب ورکول به په حکومت باندې د خلکو باور زيات کړي او خلک به هم نور د حکومت په وړاندې مسولیت پذير چلند وکړي.

دا چې اوس خلک پخپله په دې قناعت دي چې حکومتي چارواکي د خپل ځان د ګټو لپاره کار کوي نو په حکومت باور نه کوي د حکومت مال خپل مال نه ګڼي، فضلي وويل که ملت ته حساب ورکړل شي نو د ملت مرسته او باور به دواړه د حکومت سره وي او دا کډې همکارۍ به په افغانستان کې د يو بنسټيز او غښتلي حکومت په رامنځته کېدو کې مرسته وکړي.

د نړيوالو مرستې شفافیت پورې اړه لري
د ولسمشر سلاکار همداراز وويل چې نړيوال به بې حسابه مرستو ته دوام ورنکړي، نړيوال د حکومت څخه د خپلو مرستو حساب غواړي، نړيوال غواړی په دې پوه شي چې پيسې يې په افغانستان کې په څه باندې مصرف کېږي.

فضلي وويل چې د خلکو سره ګډ کار د معلوماتو شريک کول او حساب ورکول به ددې سبب شي چې شفافيت رامنځته شي او په دې ډول به د نړيوالو باور هم رامنځته شي او نړيوال به نه يوازې چې د افغانستان سره مرستې کمې کړي بلکې خپلې مرستې به نورې هم زياتې کړي.

فضلي په داسې حال کې په افغانستان کې د يوې پرانیستې او ملت شموله دولت دارۍ څخه خبرې کوي چې اوس مهال د هېوادوالو همکاري د حکومت سره پيکه ښکاري خو که د چارواکو خبرې د عمل ساحه کې وليدل شي نو هېڅ شک نشته چې د فضلي خبرې دې په حقيقت بدلې شي.