طالبانو د دوحې د تړون د بديل اړوند خپل دریځ بيان کړ

خبريال وېبپاڼه- په دې وروستيو کې ددوحې په تړون باندې نيوکې زیاتې شوې دي، په افغانستان کې دننه او بيرون دا تړون اوس د ګواښ سره مخ دی او ډېره غوښتنه کېږي چې ددې تړون ځای باید یو بل تړون ونيسی.

دا هغه څه چې طالبانو نن په یوه اعلامیه کې ددې تړون د کليزې په مناسبت په کلکه رد کړي دي، خو پوهان وايي چې دا تړون د افغانستان په مورد باندې غوڅ څه نلري او بيا بېرته طالبان غواړی د افغانستان د حکومت او د افغانستان د مسايلو اړوند هرڅه ددې توافقنامې په بنسټ باندې حل کړي او بحث ورباندې وکړي.

د چارو شننونکي وايي چې په دې تړون کې د افغانستان مسايل د امريکا سره په داسې ډول تړل شوي دي چې واضح مفهوم يې مالوم نه دی، د يوې خوا اوس طالبان وايي چې هرڅه به ددې تړون له مخې مخ ته وړي او بلې خوا بیا وايي چې ددوی تړون د امريکا سره شوی دی نه د افغانستان د حکومت سره.

په کابل کې د حالاتو څارونکي وايي چې پکار ده د طالبانو سره شوی تړون یا نوی شی او يا هم اصلاح شي ځکه په بل ډول دا تړون نيمګړی دی او نشي کولی چې په افغانستان کې د جګړې اور مړ کړي او سوله قايمه کړي.

په اوسني تړون کې تر ډېره د امريکا ګټې او په ځانګړي ډول د امريکا د پخواني ولسمشر ډونالډ ټرمپ ګټې رانغښتې دي او د همدې ګټو په بنسټ په فوري ډول شوی دی، زلمي خليلزاد په دې تړون کې بېړه کړې ده ترڅو دا د امريکا په ټاکنو کې د ولسمشر ډونالډ ټرمپ په برخه کې يو مثبت ټکی زئات کړي.

د بلې خوا پخپله د امریکا نوی حکومت همدا اوس ددې تړون په ارزونه بوخت دی، د امريکا ولسمشر جوبایډن په دې اړوند وويل چې ددوحې تړون ته ژمن دي خو په دې شرط چې طالبان هم ورته ژمن پاتې شي.

د امريکا د بهرنیو او دفاع وزارتونو په يوه اعلاميه کې ويلي دي چې طالبانو ددوحې تړون ډېری برخې سمې نه دي عملي کړې، جګړې زياتوالی موندلی او اوس هم دا ډله د القاعده او نورو بهرنيو جنګياليو او ډلو سره يې اړيکې لري.