fbpx

مېرمن وېلز له ولسمشر سره پر سوله او راتلونکو ټاکنو خبرې کړې دي

 

خبریال وېب پاڼه – کابل- ۱۳ مۍ ۲۰۱۹ د مرکزي او جنوبي اسیا لپاره د امریکا دبهرنیو چارو مرستیاله الیس وېلز تېر ورځ کابل ته را رسېدلې او دلته یې د حکومت د لوړو پوړو چارواکو سره لیدلي دي ، مېرمن وېلز د ولسمشر سره د افغانستان په روان وضعیت خبرې کړې دي ، د ارګ څخه په خپره شوې خبر پانه کې راغلي ،چې وېلز له ولسمشر سره په کتنه کې په ښې حکومت ولۍ ، ځان بساینې او همدارنګه د راتلونکې ولسمشریزې ټاکنې په خپل وخت تر سره کېدو باندې بحث کړی دی . د خبرپاڼې له مخې په دې کتنه کې د سولې د روان بهیر پر مختګونو ، د سولې مشورتي جرګې په بریالۍ توګه تر سره کېدو او پایلو هم د دواړو لورو ترمنځ بحث او خبرې وشوې .

بل خوا اجرایه رئیس عبدالله عبدالله هم پر ټویټر لیکلي، چې د مېرمن وېلز سره یې د سولې پر هڅو او په ټاکلي وخت د ولسمشریزې ټاکنو په ترسره کېدو خبرې کړې دي .

د امریکا سفارت د یوې خبر پاڼې په خپرولو چې تېره ورځ خپره شوې ده ویلي ، د مرکزي او جنوبي اسیا لپاره د امریکا د بهرنیو چارو مرستیاله آلېس وېلز به په کابل کې د مدني ټولنې له استازو سره هم وګوري او په افغانستان کې به  په روان وضعیت خبرې وکړي .

مېرمن وېلز د افغانستان د سولې د روان بهیر سره د مرستې په پار دوه اونۍ وړاندې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد سره آسلام آباد ته تللې وه او له پاکستاني چارواکو سره د افغان سولې په اړه خبرې کړې وې .

 

 

 

 

 

 

Loading...