د پاکستان کرکټ بورډ غوراوي کمېټې دوه غړي ګوښه کړي
د پاکستان کرکټ بورډ وروسته له هغې چې په (۲۰۲۴) نړيوال جام کې يې خواشينوونکې ماتې وخوړې، د غوراوي کمېټې دوه غړي له دندو کوښه کړل.
د پاکستان کرکټ بورډ تاييد کړې چې د غوراوي کمېټې دوه غړو عبدالرزاق او وهاب رياض ته يې خبر ورکړی چې دوی دواړه نور د غوراوي کمېټې غړي نه دي او دندې يې پای ته رسېدلي دي.
عبدالرزاق نه يوازې د نرينه وو د غوراوي کمېټې غړی و، بلکې د ښځينه وو د غوراوي کمېټې غړی هم و، خو وهاب رياض يوازې د نرينه کرکټ لوبډلې د غوراوي کمېټې غړی و.
دا پرېکړه له هغې وروسته وشوه چې پاکستان د (۲۰۲۴) شل اوريز نړيوال جام کې له امريکا او هندوستان څخه له خواشينوونکې ماتې وخوړې او په ګروپي مرحله کې له نړيوال جام څخه ووتل.
تر دې وړاندې وهاب رياض د غوراوي کمېټې د مشر په توګه دنده ترسره کوله، چې وروسته بيا د دې کمېټې غړی شو، نوموړي له پاکستانۍ لوبډلې سره نړيوال جام ته د مشر مدير په توګه هم سفر کړی و.
په تېرو څلورو کلونو کې د پاکستان کرکټ بورډ د غوراوي کمېټې شپږ مشران وهاب رياض، محمد وسيم، شاهد افريدي، انظمام الحق، هارون رشيد او مضباح الحق دي، بدل کړي دي.
د يادونې وړ ده چې په ياد نړيوال جام کې افغان کرکټ ملي لوبډلې د نيوزيلينډ، استراليا او بنګلدېش په څېر پياوړو لوبډلو ته په ماتو ورکولو تر نيمه پايلوبې ځان رسولی و.
راپور: فياض حميد
