fbpx

په هلمند کې د امریکايي ځواکونو هلیکوپټره رانسکوره شوې

خبریال ویب پاڼه – کندهار ۲۵مۍ ۲۰۱۹ / په هلمند ولایت کې د عملیاتو پر مهال د امریکايي ځواکونو یوه اپاچي هلیکوپټره رالوېدلې ده .

دغه دوه څرخه الوتکه تېره شپه په نوزاد ولسوالۍ کې هغه مهال را نسکوره شوه ، چې دغه ولسوالۍ ته یې افغان او امریکايي ځواکونه د عملباتو لپاره انتقالول .

د هلمند د والي ویاند دغه پېښه تائیدوي ، زیاتوي چې په دغه هلیکوپټره د تخنیکي ستونزې له کبله بېرنۍ ناسته کړې ده ، خو عمله یې ټوله ژغورل شوې ، خو الوتکه په بشپړه توګه ویجاړه شوې ده .

په افغانستان کې د امریکايي ځواکونو ویاند ډیویډ بټلر د دې پېښې په اړه ویلي ، چې د امریکايي ځواکونو یوه «CH-47» ډوله الوتکه یې هغه مهال په هلمند ولایت کې ویجاړه شوه ، چې عملیاتو ته یې ځواکونه ښکته کول چې له ځمکه سره ولګېده او اور یې واخیست . د نوموړي په خبره الوتکه په بشپړه توګه ویجاړه شوې ده .

بټلر فرانسې خبري اژانس ته ویلي ، چې « په الوتکه کې ټول افغان او امریکايي سرتیري ټپیان شوي دي او روغتیايي حالت یې د ډاډ وړ دی » . امریکايي چارواکو ویلي چې د پېښې پر مهال په دغه الوتکه د طالبانو او یا هم د بلې کومې وسله والې ډلې له لوري ډزې نه دي شوې .

طالبانو د یوې ويډیو په خپرولو سره ویلي ، چې تېره شپه ۹ بجې د هلمند ولایت د نوزاد ولسوالۍ د هرمز بازار ته نږدې د امریکايي ځواکونو یوه اپاچي هلیکوپټره د عملیاتو پر مهال را نسکوره شوې  ده او  ټولې سپرلۍ یې وژل شوې دي .

په افغانستان کې امریکايي اپاچي هلیکوپټرې په عملیاتو کې د د افغان او امریکايي سرتېرو د لېږدولو لپاره کارول کیږي . تر دې څو کاله وړاندې دا ډول یوه الوتکه په میدان وردګو ولایت کې د طالبانو له لوري را نسکوره شوې وه .