معصوم ستانکزی: له (پاکستان) تمه لرل د ځان تېر ایستل دي
معصوم ستانکزی د پاکستان وروستیو بریدونو او له افغانستان سره د چلند په اړه یې په خپلو تازه څرګندونو کې ویلي دي، چې له داسې چا تمه لرل چې دا هېواد (افغانستان) یې کنډواله کړی دی، د ځان تېر ایستل دي.
نوموړي د پاکستان نوم نه دی اخیستی، خو د طالبانو وروستیو څرګندونو او د پاکستان چلند ته یې اشاره ده. هغه وویل چې د ستونزو د حل یوازینۍ لار د افغانانو په ملي اېجنډا او قانوني نظام راغونډېدل دي، چې دا چاره به د ټولو حقونه خوندي کړي.
د اسلامي جمهوریت د سولې مرکچي پلاوي مشر معصوم ستانکزی همدا راز ملي مسایل په ټولو افغانانو پورې تړلي یادوي او یوازې د واک په چوکۍ ناستو خلکو پورې یې نه تړي. هغه وايي چې طالبان ته دې وګوري چې چا ورسره خواخوږي لرله هغوی ترې اوس ولې تېښته کوي.
د یادولو وړ ده، چې په دې وروستیو کې د طالبانو له خوا د افغانستان په خاوره کې هوايي بریدونه هغه څه و چې د افغانانو غصه یې راوپاروله، خو طالبان یې په ځای د دې چې ځواب ورکړي، یوازې یې ورته اخطار ورکړ، چې که بیا داسې وشي، نو دوی به یې ځواب ورکړي.
همدا راز ځینو طالب چارواکو بیا دې چارې ته دا دلایل هم وتراشل، چې د افغانستان په اړه د پاکستاني سیاستوالو نظرونه بدل شوي دي، خو یو شمېر کسان غواړي چې د افغانستان او پاکستان ترمنځ جوړې اړیکې خرابې کړي.
