جنرال مبین: په افغانستان کې شرایط خراب او ستونزمن دي
د جنرال مبین په نوم مشهور د طالبانو د ټولنیزو رسنیو مشهور مبلغ جنرال مبین چې اوس له افغانستان څخه وتلی او په متحده عربي اماراتو کې دی، وايي چې په افغانستان کې کاري شرایط سخت او ډېر ستونزمن دي.
دا خبرې نوموړي د متحده عربي اماراتو دولت ته په خپله هغه عریضه کې کړې دي، چې د ویزې د تمدید لپاره یې لیکلې ده، ځکه دا دویم ځل دی چې نوموړی د خپلې ویزې د تمدید لپاره د اماراتو له حکومت نه غوښتنه کوي، لومړی ځل ویزه یې رد شوې ده.
په ټولنیزو رسنیو کې د نوموړي هغه عریضه خپره شوې ده، چې هغه د متحده عربي اماراتو دولت ته لیکلې ده. هغه له دغه دولت څخه غوښتي دي، چې د کورنۍ یوازینی سرپرست دی، په افغانستان کې کاري شرایط خراب او ستونزمن دي. هغه له اماراتو غوښتنه کړې ده چې په خپله مبارکه خاوره کې دې ورته د کار کولو اجازه ورکړي، تر څو دغلته د خپلې کورنۍ لپاره نفقه وګټي.
د یادولو وړ ده، چې جنرال مبین دوبۍ ته په سیاحتي ویزه تللی دی، غوښتل یې هلته په خپل نوم شرکت راجستر کړي، خو حکومت یې دغه غوښتنه رد کړې وه.
جنرال مبین هغه څوک دی، چې د طالبانو د کابل نیولو څخه مخکې به یې په ټولنیزو رسنیو کې د دوی په ګټه تبلیغات کول، وروسته چې طالبان واک ته ورسېدل، نو هم نوموړی کابل ته ورسید او د دوی یو له مشهورې څهرې څخه شو، خو وروسته بیا د پاکستان پر ضد د څرګندونو له امله څو ځله د طالبانو له خوا بندي هم شو.
