بریتانوۍ وزیرې هم د افغانستان کرکټ لوبډلې ملاتړ وکړ
د برېتانیې د کلتور وزیرې لیزا ناندي د افغانستان کرکټ ملي لوبډلې پر ضد د روان پروپاګند پر ضد خپل غږ پورته کړی دی او ویلي یې دي، چې د طالبانو د ناسمو کړنو له امله افغان لوبغاړو ته سزا ورکول نه دي پکار.
نوموړې دا څرګندونې له بي بي سي سره په خبرو کې کړي دي.
هغې په دغه څرګندونو کې ویلي دي، چې د انګلستان لوبډله باید چې د افغانستان سره په چیمپینز ټرافۍ کې لوبه وکړي. هغه وايي، زما په فکر د دې سیالۍ لغوه کول به کومه ګټه ونکړي او باید چې ورزشي لوبې ترسره شي. ځکه چې د طالبانو د سیاستونو له وجې ورزشکاران ملامت نه دي.
د یادولو وړ ده، چې د بریتانیې د پارلمان ګڼ شمېر غړو د انګلستان کرکټ بورډ نه په یو خط کې د افغانستان سره د لوبې د لغوه کولو غوښتنه کړې وه، خو د انګلستان کرکټ بورډ دغه غوښتنه رد کړه.
ویل کېږي، چې فوزیه کوفي هغه څوک ده چې دغه غوښتنه یې د انګلستان له پارلمان څخه کړې وه او همدا راز د انګلستان کرکټ بورډ نه یې هم غوښتنه کړې ده، چې له افغانستان سره دې لوبې نه کوي.
د افغانستان کرکټ ملي لوبډلې سره د لوبې نه کولو غږ د دې لپاره پورته کېږي، چې ګوا کې په دې توګه به په افغانستان کې د ښځو پر وړاندې روانو بندېزونو لپاره یو غږ پورته شي، خو د یادولو ده، چې افغان لوبغاړو په خپله بیا بیا د نجونو د زده کړو په حق کې غږونه پورته کړي دي.
