د پاکستاني زندانونو څخه ۴۵ افغانان راخوشې شول
د پاکستان له بېلا بېلو زندانونو څخه ۴۵ افغانان، چې د قانوني اسنادو نه لرلو په جرم نیول شوي و، راخوشې شوي او بېرته هېواد ته راستانه شوي دي.
د کډوالو او بېرته راستنېدونکو چارو وزارت په یوه اعلامیه کې ویلي دي، چې د پاکستان له بندخونو ۴۵ تنه افغان بندیان خوشې شوي او بېرته خپل هېواد ته راستانه شوي دي.
دوی په دغه خبرپاڼه کې ویلي دي، چې دا هغه افغانان و چې په پاکستان کې یې قانوني اسناد نه لرل او له دې امله د پاکستان پولیسو له خوا نیول شوي و.
د یادولو وړ ده، چې په دې وروستیو کې یو ځل بیا پاکستان د افغانانو په نیولو پیل کړی دی، چې د پاکستان پلازمېنه اسلام اباد او پېنډۍ ښار کې یې په سلګونو افغانان نیولي دي.
یو شمېر افغانانو ویلي دي، چې پولیسو نه یوازې هغه افغانان نیولي چې قانوني اسناد یې نه لرل، بلکې ګڼ شمېر هغه افغانان یې هم نیولي، چې یا یې د ویزو موده ختمه شوې وه او یا یې اسناد هم لرل، ګڼ شمېر داسې هم پکې شته چې هلته د بېلا بېلو هېوادونو ته تګ په هیله ناست و.
