د قرآن کريم د نزول په مناسبت د قرآن کريم د ختم غونډه ترسره شوه

د افغانستان د علومو اکاډمۍ د اسلامي علومو د معاونيت د تفسير او حديثو مرکز په هڅو د قرآن کريم د نزول او روژې په مناسبت او په هېواد کې د سولې او امنيت د تأمين په موخه په لومړي سر کې د قرآنکريم ختم  تر سره شو ، ورپسې په  علمي غونډه کې د علومو اکاډمۍ د عمومي رئيسې څېړنوالې ثريا پوپل په حضور او ګڼ شمېر څېړونکو، عالمانو او د دې ادارې د کارکوونکو په ګډون د روژې په ۲۶مه نېټه، چې د ۱۳۹۷ لمریز کال د غبرګولي له دوه ويشتمې سره سمون لري، د یادې ادارې د علامه کهزاد په تالار کې جوړه شوه.

په دغې غونډه کې د علومو اکاډمۍ رئيسې څېړنوالې ثريا پوپل د خپلو خبرو په ترڅ کې وويل چې: دغه متبرکه غونډه د قرآن کريم د نزول او روژې د عظمت په مناسبت په ګران هېواد افغانستان کې د سولې او امنيت په هيله جوړه شوې ده ، چې د الله تعالی په مرحمت په هېواد کې اتحاد، اتفاق، سوله  او امنيت قايم شي.

د علومو اکاډمۍ علمي منشي داکتر احمد شاه عمر وردک د خپلو خبرو په ترڅ کې څرګنده کړه چې: روژه له طبي لحاظه ډېرې ګټې لري او د ډېرو امراضو د معالجې حکمت پکې نغښتی دی ، چې  په ځينو ځانګړو حالتونو او نارغيو کې، چې دين هم هغوی د مریض او مسافر په حکمونو کې راوستي او د روژې د افطار اجازه يې ورکړې ده.

څېړنوال عبدالرحمن عادل د خپلو خبرو په ترڅ کې وويل چې د رمضان مياشت د کال په مختلفو موسمونو کې په دې خاطر هم په ګرځېدو کې ده، چې له يوې خوا مسلمانان د کال په بېلابېلو موسمونو کې له ستونزو او سختيو سره په مبارزه کې مقاوم شي او له بلې خوا په هر موسم کې د نورو له ستونزو څخه خبر شي.

د غونډې په دوهمه برخه کې د پوښتنو اوځوابونو برنامه جوړه شوه، چې څلورو تنو استادانو هر يو؛ څېړنپوه عبدالمعبود ضریری، څېړنوال عبدالکريم فضلي، څېړنوال فضل الرحيم محمود، څېړنوال محمد يوسف حازمي د ګډونوالو پوښتنو ته د اسلامي ارشاداتو په رڼا کې ځوابونه وړاندې کړل.

د غونډې په درېمه برخه کې د علومو اکاډمۍ د منسوبينو له خوا راټولې شوې مرستې د دې ادارې په مستحقينو او نادارو خدماتي کارکوونکو ووېشل شوې او غونډه په  ګران هېواد کې د سوکالۍ او امنيت په هيله په دعائيه باندې پای ته ورسېدله.