امریکا د کرونا ضد واکسین جوړ کړي

خبریال ډاټ کام/وروسته له هغه چې د نړۍ تر سلو زیاتو هېوادونو ته د کرونا ویروس خپل یرغل یووړ، امریکایي چارواکو اعلان وکړ چې د دې وژونکي ویروس لپاره یې یو ډول واکسین جوړ کړي دي چې نن دوشنبه به یې و آزمایي.

د اسوشیټېد پرس خبري آژانس د راپور له مخې یو امریکایي چارواکي د نوم نه ښودلو په شرط ویلي چې امریکا توانېدلې چې د کورونا ویرو ضد واکسین جوړ کړي دي. ويل شوي د روغتیايي مرکز د واکسينو کارولو ته مالي مرستې ورکوي او دا کار به د واشنګټن د روغتیا د څيړنې په مرکز کې ترسره کولی شي.

د روغتیا پالانو په وینا دا واکسین به ښایي له یو نه تر یو نیم کال پورې وخت ونیسي چې په لوړه کچه واکسین ترې جوړ شي. د معلوماتو له مخې یادو شویو واکسینو ته ۴۵ کسان چمتو شوي چې ورباندې و آزمایل شي. دا کسان په کورونا اخته نه دي او ویل کېږي چې واکسین به ورته هېڅ جانبي عوارض و نه لري.

اوس په نړیواله کچه څېړنې او هلې ځلې روانې دي چې د کورونا د مخنیوي لپاره واکسین جوړ او خپاره شي. کورونا ویروس په لمړي ځل د چین له ووهان ښار څخه را پیدا شو او په ټول چین کې یې زرګونه کسان ووژل او تر ۸۰ زرو زیات نور پرې اخته شول. ورپسې ایران د دغې خونړي ویروس کوربه شول چې تر اوسه یې هلته هم تر ۶۰۰ زیات کسان وژلي او له لسو زرو بره کسان پرې روږدي دي.

د یادونې وړ ده چې په چین کې دغه ویروس د له منځه تلو په حال کې دی او ټول روغتیا پالان یې نورو پر کورونا اخته هېوادنو ته واستول څو وکولی شي د دغې نړیوالې وبا مخه ډب کړي.

کله چې دغه ویروس د چین او ایران ډېر وګړي تلف کړل، دواړو هېوادونو امریکا ته د بیولوژیکي جګړې په شک کولو ګوتڅنډنه وکړه خو دا چې دې ویروس امریکا هم آرامه پرې نه ښوده او سلګونه کسان پرې اخته او تلف شول، د دې ویروس د خپرېدو ماهیت یې نور هم پېچلی کړ.

په کورونا ویروس د اخته کېدو لومړنۍ علامې تبه، توخېدا، ذوکام، سردردي او ساه لنډي ده. په پوخ عمره کسانو باندې یاد شوی ویروس زیات اغېز کوي ځکه د روغتیا پالانو په وینا د هغوی د معافیت سیستم کمزوری وي او له همدې امله د کورونا د وژل شویو کسانو لوړه فیصدي ډېر عمره کسان دي.

اوس د ټولې نړۍ سترګې یوې آسماني مسیحا ته دي چې دغه ویروس کابو او له منځه یوسي. د امریکا لخوا جوړ شوي واکسین که بریالي شي، په نړۍ کې خپره شوې وېره به تر یوه بریده را کابو شي او د ژور خپګان له امله کورونا ته ورکوونکې قربانۍ به صفر شي.