بیګ باش لیګ کې افغان لوبغاړي ظاهر خان په توپ اچونکو باندې راج کوي

خبریال وېبپاڼه / د افغانستان کرکټ ملي لوبډلې کیڼ لاسی چینامېن ورو توپ اچونکي ظاهرخان په بیګ باش سیالیو کې خپلو ښو لوبو ته دوام ورکړئ.تیره شپه یې د خپلې ملبورن رنیګډز لوبډلې په ګټه په زړه پورې توپ اچونه ترسره کړه.

نوموړي څلورو اورونو کې ۲۷ منډې ورکړې او دوه مهم لوبغاړي کریس لاین او ډوکټ یې له مخې پورته کړل.

د یادو ویکټو په اخیستلو سره نوموړي په روانو بیګ باش سيالیو کې د زیاتو ویکټو اخیستوونکو بالرانو په لیست کې لومړۍ مقام خپل کړ.

نوموړي تردې دمه درې لوبو کې ګډون کړی او ټولټال یې دوولس اورونه ترسره کړي چې د ۸۴ منډو په ورکولو سره یې ۷ ویکټې ترلاسه کړي دي.

د نوموړي د اورونو ایوریج یا اوسط هم ښه دی او په هر اور کې په اوسط ډول تر ۷ څخه پورته منډې ندي ورکړې.

په نورو افغان لوبغاړو کې بیا راشدخان درې لوبو کې درې ویکټې ترلاسه کړي دي.

قیس احمد دوو لوبو کې درې ویکټې ترلاسه کړي دي.مجیب او محمد نبي بیا په درې لوبو کې یوه،یوه ویکټ ترلاسه کړي ده.

تراوسه په بیګ باش سيالیو کې زیاتو منډو جوړونکو لوبغاړو لیست کې د سيډني سکسرز لوبدلې لوبغاړی هنریکس له ټولو وړاندې دی.

نوموړي درې لوبو کې ۱۷۶ منډې جوړې کړي دي.په دوهم مقام یې د خپلې لوبډلې ملګری پېلیپ دی چې ۱۶۰ منډې یې جوړې کړي دي.