fbpx

د کندهار يوازي (۱۵) سلنه اوسيدونکي د نل پاکو اوبو ته لاسرسی لري

د غيري رسمي شمېرو له مخي کندهار ولایت کې شااوخوا درې ميلیونه کسان ژوند کوي خو يوازي ۱۵ سلنه اوسېدونکي يې د چښاک پاکو اوبو ته لاسرسی لري.

د کندهار د اوبو رسوني ادارې مشر انجنير محمد نادر کاکړ نن خبريالانو ته وویل، چي د کندهار له شپږ زرو زياتو کورنیو ته  د نل له لاري پاکي اوبه ورکوي خو په ځينو سيمو کي د اصلاحي پلان د نه عملي کېدو له امله ګڼي کورنۍ ترې پاته دي.

کاکړ وایي د کندهار د اوبو رسولو د شبکې د رغوني چاري هم بشپړي سوي دي.

د کندهار د اوبو رسوني د ادارې مشر همداراز وایي، چي په راتلونکي کال کي به د کندهار د سپين بولدک ولسوالۍ ترڅنګ، د لښکرګا او کلات ښارونو اوسیدونکو ته هم د نل له لاري پاکي اوبه ورکړي خو نوموړی له خلګو غواړي، چې د اوبو د مصرف بېلونه پر وخت تحویل کړي.

کندهار د هېواد د هغو لسو ولایتونو له ډلي څخه دی، چي د ځنګلي سیمو د له منځه تلو او د باراني اوبو د زياتو ضايعاتو له کبله د وچکالۍ له خطر سره مخامخ دی.

دیادوني وړده چې د کندهار نېش، ارغستان او ريګستان هغه ولسوالۍ دی، چي د وروستیو وچکالیو له امله يې اوسیدونکي سخت زيانمن سوي دي.