د پاکستان او نیوزیلنډ ترمنځ د لوبو مخکي د نیوزیلنډ یو امنیتي پلاوی پاکستان ته ځي
خبریال وېبپاڼه / یو شمیر راپورونه وايي د نيوزيلاند کرکټ بورډ غواړي چې د پاکستان سره په دغه هيواد کې د لوبو لپاره د مهالوېش ټاکلو وړاندې خپل یو امنیتي پلاوی پاکستان ته وليږي ترڅو د ياد هيواد امنيتي وضعيت وارزوي.
ويل کيږي چې د نيوزيلاند ياد امنيتي پلاوی به په راتلونکي اګست مياشت کې پاکستان ته سفر وکړي، چې د ياد هيواد د امنيتي وضعيت ارزولو وروسته به د نيوزيلاند کرکټ بورډ تصميم نيسي چې پاکستان سره د لوبو لپاره خپله ملي لوبډله ياد هيواد ته وليږي یا نه.
دا په داسې حال کې ده چې پاکستان کرکټ بورډ لا وړاندې ويلي وو چې د نيوزيلاند کرکټ بورډ ورسره د دوی په کوربه توب د راروان شل اوریز نړېوال جام وړاندې په لنډ فارمټ لوبو موافقه کړې.
د يادولو ده چې د نيوزيلاند کرکټ ملي لوبډلې له ۲۰۰۳م کال راهيسي پاکستان ته د لوبو لپاره سفر نه دی کړی.
