په پاکستانۍ لوبډله کې د اشوین د خوښې لوبغاړي
خبریال وېبپاڼه /د هند کرکټ ملي لوبډلې پياوړي سپېنر راوي چندرن اشوېن څخه په ټويټر د سوال او ځواب په سیزن کې پوښتنه وشوه چې په پاکستانۍ لوبډله کې د خوښې درې لوبغاړي په ګوته کړي.
اشوین یې په ځواب کې د بابر اعظم، محمد رضوان او شاهين شاه افریدي نومونه ياد کړل.
يادو درې لوبغاړو په تېر شل اوریز نړیوال جام کې پاکستان لپاره غوره لوبې نندارې ته وړاندې کړې، او خپله لوبډله یې د نړيوال جام تر نيمه پايلوبې ورسوله.
اشوين وايي: ” زه د محمد رضوان لوبې ګورم او په تېر کې مې هم د نوموړي یادونه کړې، هغه یو پياوړی لوبغاړی دی چې په سختو حالاتو کې ښې لوبې کوي. خو تر کومې چې د بابر اعظم لوبه ده، خورا بهترینه او ښه لوبه کوي.”
نړيوال جام کې د ښو لوبو وروسته پاکستانۍ لوبډلې وېسټ انډیز ته هم په شل اوریزو لوبو کې د ۳-۰ ماته ورکړه او روان کال په ياد فارمټ لوبو کې يې د پاکستانۍ لوبډلې د ګټې سلنه او رېکارډ لا پسې پورته کړ.
