وهاب رياض له لندنه بېرته پاکستان ته شړل شوي
خبریال وېبپاڼه / د پاکستان فاسټ بالر وهاب رياض چې د انګلینډ په سل باليز کرکټ ليګ کې د ګډون لپاره لندن ته رسیدلی، بېرته پاکستان ته شړل کيږي.
د یو شمیر راپورونو له مخې نوموړی په غلطه ويزه انګلستان ته تللی او اوس اړ دی چې پاکستان ته ستون شي تر څو د ويزې ستونزه حل کړي.
وهاب رياض ډاډمن دی چې د ويزې ستونزه به يې زر حل شي او نوموړی به وکولی شي د سل باليز کرکټ ليګ لومړي پړاو کې پخپل وخت ګډون وکړي.
سل باليز کرکټ ليګ د کرکټ نوې بڼه ده چې سږکال يې لومړی پړاو د جولای مياشتې په يوويشتمه نېټه د انګلستان کرکټ بورډ په نوښت پيليږي.
تمه ده چې يادو سياليو کې به د افغانستان څلور لوبغاړي قيس احمد، راشد خان، مجيب الرحمن او محمدنبي هم ولوبیږي.
