د هند او نیوزیلنډ ترمنځ د ټیسټ لوبو د قهرمانۍ جام پایلوبه
کریکبال وېبياڼه / د کرکټ نړیوالې شورا یا آی سي سي د ۲۰۱۹م کال د اګسټ میاشتې د لومړۍ نېټې څخه د ټیسټ قهرمانۍ جام سیالۍ پيل کړي دي، چي په دې لوبو کې ټولې مخکښې او نامتو لوبډلې شاملې دي.
د راپورونو له مخي د ټیسټ لوبو قهرمانۍ جام کې تر دې دمه پورې ټولې ۵۷ سیالۍ شوې دي، چې پایلوبه به یې د راتلونکې جون میاشتې په ۱۸مه نېټه د هند او نیوزیلینډ کرکټ ملې لوبډلو ترمنځ د انګلستان په ساوتمټن ښار کې ترسره شي.
ددې جام په لومړي ځای کي هند، دویم ځای کې نیوزیلینډ، درېیم ځای کې اسټرالیا، څلورم ځای کې انګلستان، پنځم ځای کې پاکستان، شپږم ځای کې ویسټ انډیز، اووم ځای کي سویلي افریقا، اتم ځای کې سریلانکا او نهم ځای کې بیا بنګله دېش شتون لري.
ددې جام پایلوبه؛ ځکه د هند او نیوزیلینډ ترمنځ ترسره کیږي، چې دواړې پکې مخکښي دي.
د راپورونو له مخې د کرکټ نړېوالې شورا د ټېسټ لوبو قهرمانۍ جام پایلوبې ته دوه اُصول ایښي، چي د مینوالو په اند څه ناڅه جالیب ښکاري.
۱ـ اُصول: که د دواړو هیوادونو ترمنځ یاده پایلوبه مساوي شوه، نو د اتلولۍ جام به دواړو لوبډلو ته ورکول کیږي او د یادو اُصولو له مخي بیا دواړې لوبډلې ګټونکې اعلانیږي.
۲ـ اُصول: دا لوبه د جون میاشتې په ۱۸مه پيلیږي او تر پنځو وروسته د جون په ۲۲مه پای ته رسیږي؛ خو که چیري لوبه کې باران او یا هم د وخت کمښت رامنځته شو، لوبه به بلي ورځي ته هم شامله شي، تر څو لومړۍ مقام ګټونکې لوبډله په سم ډول معرفي شي.
